Վրացական Georgia times կայքին տված հարցազրույցի ժամանակ ռուս քաղաքագետ, պատգամավոր Սերգեյ Մարկովը մեկնաբանել է մեկ այլ ռուսաստանցի քաղաքագետ, Ռուսաստանի իսլամական կոմիտեի նախագահ Հեյդար Ջեմալի այն հայտարարությունը, թե Վրաստանը պետական հեղաշրջում է պատրաստում Ադրբեջանում.
«էդուարդ Շևարդնաձեի գահընկեցությունից անմիջապես հետո Վրաստանի ներկայիս ղեկավարությունն իրեն հռչակեց հեղափոխությունների տարածող: Այն ժամանակ Սաակաշվիլին իր ընկեր Վիկտոր Յուշչենկոյի հետ դարձավ յուրատեսակ «ժողովրդավարական երկրների միության» կազմակերպիչներից մեկը:
Այժմ հնարավոր է` տարածաշրջանում իրավիճակի սրումը կապված լինի նրա հետ, որ Թբիլիսին կորցնում է Վաշինգտոնի աջակցությունը:
Ամերիկացիները գործնականում զրոյացրել են վրացական բանակին ցուցաբերվող ֆինանսական աջակցությունը՝ բացառությամբ Աֆղանստանում գտնվող վրաց խաղաղապահների: Այդպիսի տխուր ճակատագրի են արժանացել նաև բազմատեսակ «խաղաղ» դրամաշնորհները, որոնց հարցում Արևմուտքը նախկինում բավական առատաձեռնություն է ցուցաբերել:
Դրա համար էլ այժմ Սաակաշվիլին նոր միջոցառումներ է ձեռնարկում ԱՄՆ-ի ուշադրությունն իր վրա բևեռելու համար: Հյուսիսային Աֆրիկայում ու Մերձավոր Արևելքում տարածված հեղափոխական ալիքը Սաակաշվիլիի համար բացառիկ պահ է համարվում:
Բացի այդ, քաղաքական ասպարեզից Իլհամ Ալիևի հեռացումը չափազանց ձեռնտու է հենց իրեն` Սաակաշվիլիին: Ադրբեջանում իրագործված հաջող հեղափոխությունը մեծապես կբարձրացներ Սաակաշվիլիի արժեքը և նրան կվերադարձներ Արևմուտքի կողմից հատկացվող ֆինանսական մեծ հոսքերը: Դրա համար էլ նա մի կողմից աջակցում է Ալիևին, իսկ մյուս կողմից` ադրբեջանական ընդդիմությանը:
Բնականաբար, այժմ վրացական կողմը բազմիցս կհերքի այդ տեղեկատվությունը, սակայն Ադրբեջանն առավել զգուշավորություն կցուցաբերի Սաակաշվիլիի ռեժիմի նկատմամբ: Դա մասնավորապես վերաբերում է Թբիլիսիի ու Երևանի շփումներին»:
Հիշեցնենք, որ երեկ Հեյդար Ջամալը հայտարարել էր, որ Վրաստանը պետական հեղաշրջում է պատրաստում Ադրբեջանում, և որ այդ ամենի նախաձեռնողը Վրաստանի արևմտյան գործընկերներն են, ովքեր ցանկանում են Հարավային Կովկասում կրկնել Հյուսիսային Աֆրիկայում և Մերձավոր Արևելքում տեղի ունեցած իրադարձությունները.
«Ադրբեջանն էլ հանդիսանում է Հարավային Կովկասի և, ընդհանուր առմամբ, Մեծ Կովկասի առանցքային երկիրը: Եվ եթե այնտեղ իշխանության գան Արևմուտքից առավել մեծ կախում ունեցող քաղաքական գործիչները, ապա նրանք ակնթարթորեն Ադրբեջանը կվերածեն Իրանին հարվածել պատրաստվող ԱՄՆ ռազմաբազայի»:
