Ապրիլի 30-ին Բոսթոնում տեղի ունեցած ահաբեկչության գլխավոր կասկածյալներ Թամերլան և Ջոհար Ցարնաևների հորեղբայրը՝ Ռուսլան Ցարնին, կապվել է Armenian Mirror Spectator պարբերականի հետ և իր ափսոսանքը հայտնել ԱՄՆ հայ համայնքին իր վերջին հայտարարության համար, որտեղ նա հայերին կապել էր Բոսթոնի մարաթոնի ժամանակ իրականացված պայթյունների հետ:
«Հայաստանը կրում է բարձր մշակույթ, ուստի ցանկանում եմ մի անգամ ևս հայտնել, որ նրա (Միշայի) էթնիկ պատկանելությունը որևէ առնչություն չունի կատարվածի հետ: Կուզեի երբեք այդ մասին ասած չլինեի»,- ասել է Ցարնին:
Հիշեցնենք, որ առաջին անգամ հայազգի իսլամիստ Միշայի անունը, որն իբր մեծ ազդեցություն է ունեցել Թամերլան Ցարնաևի վրա, հիշատակել էր ահաբեկիչների հորեղբայրը։
Ինչպես պարզվեց հետագայում, Միշան՝ Միխայիլ Ալախվերդովը, ընտանիքով ԱՄՆ է ներգաղթել՝ փախչելով Բաքվում հայերի դեմ իրականացվող բռնություններից: Նրա հայրը հայ է, մայրը՝ ուկրաինուհի: The New York Review ամսագրի թղթակից Քրիստիան Քարլը, ով միակն է, որ զրուցել է Միշայի ու նրա ընտանիքի անդամների հետ, ասել է, որ նա բացարձակ նման չէր «մարդկանց մանիպուլյացիայի ենթարկող հրեշավոր իսլամիստի»։ Լրագրողը նշել էր, որ Միշայի հավաստիացմամբ՝ վերջինս երբեք չի հանդիպել Ցարնաև եղբայրների հորեղբոր` Ռուսլանի հետ, ով մեղադրում է իրեն Թամերլանին արմատական իսլամիստ դարձնելու մեջ: Նա ասել է, որ ճանաչել է կասկածյալների մորը և հերքել է իր ազդեցությունը Թամերլանի վրա։
Ինչպես արդեն տեղեկացրել ենք, ամերիկահայ հեղինակավոր իրավաբան Մարկ Կիրակոսը CNN-ի ուղիղ եթերում քննադատել էր միջազգային լրատվամիջոցներին Բոսթոնի ահաբեկչության մեջ մեղադրվող Ցարնաև եղբայրներին արմատական իսլամիզմի ուղու վրա դրած հայազգի ոմն Միշայի մասին ասեկոսեները շրջանառության մեջ դնելու համար։
