Քիչ առաջ Ազատության հրապարակում մեկնարկեց ՀԱԿ կուսակցության հանրահավաքը: ԱԺ ՀԱԿ խմբակցության քարտուղար Արամ Մանուկյանն իր ելույթում նախ ներողություն խնդրեց տասնմեկ ամիս հանրահավաք չանելու համար.
«Մենք կարոտել ենք ձեզ, ձեզ զրնգուն ձայնը, ձեր աչքերի փայլը մեզ համար ամեն ինչ է: Դուք էլ զրկվել էիք համոզիչ խոսքից»,-ասաց Արամ Մանուկյանը՝ հավելելով, որ մի քանի օր հետո Երևանի ավագանու ընտրություններ են, որոնք միայն տեղական և Երևանի վերաբերող ընտրություններ չեն: Նրա խոսքով՝ այս ընտրություններն ավելին են, քան սովորական ընտրությունները, որովհետև Երևանով է լուծվելու Հայաստանի իշխանության խնդիրը, որովհետև Երևանում են կենտրոնացված բոլոր բնագավառների 50-60 տոկոսից ավելին, մինչև 90 տոկոսը.
«Եթե Աստված մեզ շնորհ բերի ՀՀԿ-ին զրկել այս մենաշնորհից, մենք լավ պարտնյորներ կլինենք: Բոլոր ոչ իշխանական ուժերը պետք է միանան, ոչ մի քաղաքական ամբիցիա չխաղացնել և Երևանը ազատագրել ՀՀԿ-ից: Համոզեք ձեր ընկերներին, համախոհներին և ոչ համախոհներին գալ և քվերակել: Եթե խնդիրն այսպես լուծվի, շատ է հեշտանալու»,-ավելացրեց Արամ Մանուկյանը:
Նա հիշեցրեց, որ 2012-ի ԱԺ ընտություններին համամասնականով ՀՀԿ-ն 35 տոկոս ձայն է հավաքել՝ բոլոր վարչական ռեսուրսների կիրառմամբ:
Ըստ նրա՝ սա համահանրապետական կարևորության քաղաքական ակցիա է: Արամ Մանուկյանի խոսքով՝ վերջին հանրապետական ընտրությունների ժամանակ ՀՀԿ-ն ջախջախվել է, Րաֆֆի Հովհաննիսյանը հաղթել է, իսկ այժմ ՀԱԿ-ը հայտ է ներկայացնում՝ ձեր ձայները շահելու:
«Մենք ամենաչարչրկվածն ենք, որ մեր ողնաշարն ամուր ենք պահել, մեզ կոտրել ու խեղճացնել չկա, ժողովուրդ»,-ասաց նա՝ հավելելով, որ հալալ է այն քաղաքական ուժերին, ովքեր այսպես են մտածում և գործում՝ համարձակ և բաց.
«Թող իմանան կուսակցությունները, որ իրենց գործընկերությունը մեզ օգուտ է, որ կուսակցությունն էլ լինի: Սիրելի՛ ժողովուրդ, ՀԱԿ-ն այն ուժն է, որը պատրաստ է վերցնելու ՀՀ քաղաքական իշխանությունը և լուծելու ձեր խնդիրները»,-ասաց Արամ Մանուկյանը՝ ՀԱԿ կուսակցության հանրահավաքը հայտարարելով բացված: