Մերձավորարևելյան երկրների մոդելավորողներն ու դիզայներները ցույց են տվել իրենց աշխատանքները Դուբայում անցկացված Fashion Forward նորաձևության առաջին փառատոնին: Դուբայը մտադիր է դառնալ տարածաշրջանի նորաձևության արդյունաբերության մայրաքաղաք: Այս մասին հայտնում է RIA Novosti-ն:
Փառատոնը, որին մասնակցել են շուրջ 20 մոդելավորողներ, անցկացվել է ապրիլի 26-29-ը՝ Դուբայի Madinat Jumeirah առողջարանային համալիրում:
«Fashion Forward-ը ձգտում է դառնալ Մերձավոր Արևելքում նորաձևության արդյունաբերության համար գլխավոր հարթակ, այն կընդգծի իր ուժեղ կողմերը, ի հայտ կբերի նոր տաղանդներ, կնպաստի այդ ոլորտի զարգացմանը»,- հայտարարում են փառատոնի կազմակերպիչները:
Ֆորումի գործադիր տնօրեն Բոնգ Գերերոյի խոսքով՝ Մերձավոր Արևելքում բազմաթիվ տաղանդավոր մոդելավորողներ կան, այդ իսկ պատճառով անհրաժեշտ է մեկնարկային հարթակ: Նա հայտնել է, որ հանրահայտ համաշխարհային բրենդները մեծ հաջողություն ունեն տեղական շուկայոււմ, սակայն նորաձևության արդյունաբերությունը Մերձավոր Արևելքում դեռևս շատ երիտասարդ է:
Առավել հեռանկարային մոդելավորողների շարքում են Ամիրա Հարունը, Թահիր Սուլթանը, Իսան, Ռամի Կադին, ինչպես նաև Tresors Sauvage նախագիծը:
Նրանց աշխատանքները դիտելու էին եկել ոչ միայն տեղի բնակիչները, այլև մասնագետներ ԱՄՆ-ից, Ֆրանսիայից, Մեծ Բրիտանիայից և արևմտյան այլ երկրներից: Նրանցից մի քանիսը կլոր սեղաններ են անցկացրել փառատոնի մասնակիցների հետ, որոնց ժամանակ կիսվել են նորաձևության արվեստում իրենց ունեցած փորձով:
Փառատոնը կանցկացվի տարին երկու անգամ՝ ապրիլին և հոկտեմբերին: Ծրագրվում է նաև ստեղծել Մերձավոր Արևելքի մոդելավորողների ասոցիացիա:
