Գյումրիի «Շիրակ» կենտրոնի ղեկավար Վահան Թումասյանը «Առաջին լրատվական»-ի հետ զրույցում անդրադառնալով Գյումրիում օրեր առաջ հնչած կրակոցներին՝ կարծիք հայտնեց, որ դրանց թիվ մեկ պատասխանատուն այսօրվա իշխանություններն են, որովհետև այն կլանները, որի մասին իրենք խոսում են, ստեղծվել են հենց իրենց ձեռքով:
Հարցին՝ կարելի՞ է հուսալ, որ ոստիկանապետ Վլադիմիր Գասպարյանի այցը Գյումրի փոփոխություն կմտցնի իրավիճակում, Վ. Թումասյանը պատասխանեց. «Դե, նա առաջին օրը անզգույշ արտահայտություններ թույլ տվեց, և դա հավասար է, որ մեկի աչքին խփես՝ կապտի, և հաջորդ օրը ծիծաղես, թե՝ աչքը կապույտ է»,- ասաց նա:
Վ. Թումասյանի համար տարօրինակ է նաև այն հանգամանքը, թե ինչպես գյումրեցիները այդքան մեծ արագությամբ որոշեցին շնորհակալական նամակ գրել նրան. «Այդ օրը՝ մինչև երեկոյան ժամը 10-ը, նրան հեռուստատեսությամբ ցույց տվեցին, հաջորդ օրն առավոտյան նամակն արդեն կար: Հարևաններով կարող էին հավաքվել, խորհրդակցել գոնե: Փոքր-ինչ տարօրինակ էր ինձ համար դա ևս, թե ինչպես այդ ամենը հաջողվեց անել այդքան կարճ ժամանակահատվածում»:
Մեր զրուցակցից հետաքրքրվեցինք՝ ո՞րն է ելքը, ինչպե՞ս անել, որ Գյումրիում հանցավոր այդ մթնոլորտը վերանա, միայն Վարդան Ղուկասյանի ձերբակալությունը կարո՞ղ է փոքր-ինչ մեղմել իրավիճակը կամ հանդարտեցնել կրքերը. «Եթե պետք է Վարդան Ղուկասյանի գլխին գործ սարքեն և ձերբակալեն, ապա, ըստ իս, դա էլ ճիշտ չէ: Եթե նրա ձերբակալությունը պետք է լինի ապօրինի՝ պարզապես քողարկելու կամ ինչ-որ բան ապացուցելու համար, ապա դա էլ ճիշտ չէ:
Ի վերջո՝ լավ է, որ այդ իրադարձությունները հանրային այսպիսի մեծ լուսաբանում ստացան: Այնպես չէ, որ նման բաներ միայն Գյումրիում են լինում՝ լինում են և՛ Վանաձորում, և՛ մի շարք այլ քաղաքներում: Կարծում եմ՝ պարզապես հենց այդ լուսաբանման և իրարանցման շնորհիվ փոքր-ինչ կհանդարտվի ամեն ինչ, իսկ այլ լուծումներ ես ինքս բազմիցս առաջարկել եմ»,- ասաց նա:
