ՌԴ Անվտանգության դաշնային ծառայությունն ԱՄՆ Հետաքննությունների դաշնային բյուրոյին է փոխանցել Բոսթոնի ահաբեկիչներ Թամերլան և Ջոհար Ցարնաևների մոր երկու խոսակցությունների գաղտնալսման ձայնագրությունները: Այս մասին հայտնում է Associated Press-ը՝ հղում անելով ԱՄՆ հատուկ ծառայությունների անանուն աղբյուրին:
Ձայնագրություններն արվել են 2011-ի սկզբին: Զուբեյդաթ Ցարնաևայի առաջին զրույցն ավագ որդու հետ է: Նրանք միասին քննարկել Թամերլանի՝ Պաղեստին տեղափոխվելու հնարավորությունը, սակայն երիտասարդը նշել է, որ ինքն արաբերեն չգիտի: Երկրորդ զրույցում կինը խոսում է մի հյուսիսկովկասցու հետ, որի դեմ դաշնային բյուրոն հետաքննություն է վարում: Նա կապված չէ Բոսթոնի ահաբեկչությունների հետ:
Գործակալությունը նշում է, որ եթե գաղտնալսման ձայնագրությունները շուտ հայտնվեին FBI-ի մոտ, վերջինս մանրամասնորեն կուսումնասիրեր Ցարնաևների ընտանիքը, որը ԱՄՆ-ն է տեղափոխվել 2000-ականների սկզբներին, և հավանաբար կկանխեր ահաբեկչությունը:
2011-ի մարտին ռուսական հատուկ ծառայությունները FBI-ին հայտնել են այն մասին, որ Թամերլանն ու Զուբեյդաթը կարող են ահաբեկչական գործողությունների մասնակից լինել: Բյուրոն ստուգում է սկսել և, չսպասելով Ռուսաստանի կողմից ավելի մանրամասն տեղեկատվության, անօրինական ոչինչ չնկատելով, 2011-ի հունիսին հետաքննությունը դադարեցրել է:
Ցարնաևան հերքում է իր կամ իր որդիների առնչությունն ահաբեկչությանը և պնդում է, որ տղաներին ինչ-որ մեկը դրդել է: Տղաների քեռին կարծում է, որ հենց մոր ազդեցությամբ է Թամերլանը թողել բռնցքամարտի պարապմունքներն ու ուսումը: Ավելի վաղ ծնողները հայտնել էին հայկական արմատներով ոմն Միշայի ազդեցության մասին:
