«Ժամանակ»-ի զրուցակիցն է Հանրապետական խմբակցության ղեկավար Վահրամ Բաղդասարյանը:
– Պարոն Բաղդասարյան, Հայաստանում ԱՄՆ դեսպանատունը երկրորդ հաղորդագրությունն է տարածել, թե հանրաքվեի ժամանակ տեղի ունեցած խախտումների պատասխանատուների նկատմամբ քննություններն ու դատական կարգով հետապնդումները պետք է լինեն թափանցիկ ու հրապարակային, որպեսզի ՀՀ ժողովրդի մոտ լինի վստահություն ընտրական գործընթացի անաչառության վերաբերյալ: Փաստորեն, այդպիսով դեսպանատունը կամ ԱՄՆ-ը փաստում են, որ խախտումներ են տեղի ունեցել:
– Նախ մեր շնորհակալությունն ենք հայտնում ոչ միայն ԱՄՆ դեսպանատանը, այլև միջազգային բոլոր կառույցներին, որոնք հետևողական են ոչ միայն հանրաքվեի, այլև ընդհանրապես Հայաստանում տեղի ունեցող իրադարձությունների նկատմամբ: Եվ բնականաբար, ԱՄՆ դեսպանատունն առաջարկում է այն, ինչը մենք ենք ցանկանում: Մենք բազմիցս հայտարարել ենք, որ տեղ գտած բոլոր անճշտությունները, խախտումները պետք է քննվեն: Եվ ընդհանրապես մենք ուշադիր ենք, որ հետևություններ լինեն ոչ միայն բողոքարկումների, այլև մամուլում եղած բոլոր հրապարակումների նկատմամբ: Իրավապահ մարմինները բոլորի նկատմամբ հետևողականություն են ցուցաբերում: Եվ այո, պետք է մանրակրկիտ հետաքննություն կատարվի, ու բոլոր այն մարդիկ, ովքեր ցանկացել են խոչընդոտել՝ ես չեմ ցանկանում պատճառների կամ ով լինելու մասին խոսել, պետք է կրեն համապատասխան պատասխանատվություն: Իսկ այդ գործընթացը պետք է լինի թափանցիկ:
– Այսինքն՝ Դո՞ւք էլ եք ընդունում, որ ընտրակեղծիքներ են տեղի ունեցել:
– Ես իրավապահ մարմինների փոխարեն չեմ կարող որևէ հայտարարություն անել, եթե եղել են բողոքներ, դրանք բոլորը պետք է քննվեն: Փաստը մնում է փաստ, որ կան բողոքներ, և 78 տեղամասերում բացվել են արկղերը, կայքերում բավականին քանակությամբ հայտարարություններ են եղել, որոնք պետք է մանրակրկիտ ուսումնասիրության ներկայացվեն: Եվ իրավապահ մարմինները պետք է մեկնաբանեն, թե դրանցից որոնք են կարճվել, իսկ եթե խախտումներ կան, ապա պետք է պարզել՝ ովքեր են դրանց հեղինակները, և նրանց նկատմամբ ինչ պատժամիջոցներ են կիրառվում:
– Իսկ չե՞ք կարծում, որ այս անգամ՝ հանրաքվեի ժամանակ, ընտրակեղծիքները շատ ավելին են եղել, այդ պատճառով էլ ԱՄՆ դեսպանատունն ու միջազգային կառույցներն այդպիսի կոշտ գնահատականներ հնչեցրին:
– Ես չեմ կարծում, որ կոշտ արձագանք են տվել, ընդամենը արձագանքել են, որ հարկավոր է քննություն կատարել, և մենք դրա կողմնակիցն ենք: Իսկ եթե դուք համեմատություններ կատարեք, ընդհակառակը, ընտրախախտումները բավականին պակասել են, պարզապես այս անգամ որոշում էր կայացվել, որ ցանկացած հայտարարություն, բանավոր խոսք պետք է քննության առարկա դառնա: Այսինքն՝ որևէ բան չի անտեսվել, որևէ բան չի կոծկվել: Սա թափանցիկության վառ վկայություններից է:
– Այդ դեպքում ինչպե՞ս եք մեկնաբանում այն իրողությունը, որ բազմաթիվ համայնքներում 80-90 տոկոս մասնակցություն է եղել այն դեպքում, երբ իշխանության ներկայացուցիչներն են ընդունում, թե կարելի է համարել, որ ընտրողների մոտ 25 տոկոսը հանրապետությունից դուրս է:
– Դրանք շատ քիչ ընտրատարածքներ են եղել, բայց ամենաառաջինը հենց դրանք են ուսումնասիրվել: Եվ դրանք հիմնականում գյուղական համայնքներ են, որտեղ մարդիկ տոնակատարության նման կամ միասնական ձևով գնում են քվեարկությունների: Իսկ այդ համայնքներում տեղի ունեցած քվեարկությունները ստուգելը դժվար չէ:
– Այսինքն՝ այդ համայնքի բնակիչները գրեթե ամբողջությամբ գյուղո՞ւմ են եղել ու այդպես միահամուռ քվեարկությա՞ն են գնացել:
– Եղել են համայնքներ, որտեղ 70-75 տոկոս մասնակցություն լինի: Իսկ փոքր համայնքներում ստուգումներ կատարելը հեշտ է:
– Պարոն Բաղդասարյան, ԱՄՆ դեսպանատան հայտարարության մեջ կա նաև այսպիսի արտահայտություն. «Հաշվի առնելով այն հանգամանքը, որ Միացյալ Նահանգները աշխարհով մեկ պայքարում է կոռուպցիայի դեմ, դեկտեմբերի 6-ի հանրաքվեի անաչառ անցկացմանն ուղղակիորեն միջամտած անձանց մասին հրապարակումներում տեղ գտած տեղեկությունները կարող են նաև կիրառվել ԱՄՆ դեսպանատան կողմից՝ դեսպանության ծրագրերում ու միջոցառումներում մասնակիցների ներգրավումը դիտարկելիս»: Սա կարծես թե պատժամիջոցի նման է հնչում: Այսինքն՝ այս անգամ խախտումներն այնքան շատ են, որ դեսպանատունն իր իրավասությունների շրջանակներում դրանց հեղինակների նկատմամբ կարող է որոշ պատժամիջոցներ կիրառել:
– Խնդրում եմ, ամեն ինչ համեմատության դաշտում գնահատեք: Հակառակը, որևէ ընտրության ժամանակ մենք նման թափանցիկության մակարդակ չենք ունեցել և նման հետևողական չենք եղել: Նաև մեր վերահսկողության արդյունքում են այդ փաստերն արձանագրվել: Եվ եթե համեմատության դաշտում դիտարկեք, այս անգամ խատումները շատ չեն եղել: Իսկ ինչ վերաբերում է ԱՄՆ դեսպանատան հայտարարության այդ վերջին ձևակերպմանը, ապա մենք չենք ցանկանում միջամտել նրանց կողմից տարվող քաղաքականությանը: Դա իրենց խնդիրն է, թե ինչ վերաբերմունք կցուցաբերեն, մենք չենք կարող նրանց միջամտել, խնդրել կամ հրահրել, թե պատժամիջոցներ մի կիրառեք:
– ԱՄՆ դեսպանատունը, օրինակ, կարող է մուտքի վիզա չտրամադրել Հանրապետական կուսակցության այն պաշտոնյաներին, որոնց անունն ավելի շատ է կապվում ընտրախախտումների հետ: Օրինակ՝ ժամանակին Գագիկ Բեգլարյանին չէին տալիս մուտքի վիզա:
– Դա այն խնդիրն է, որը ես մեկնաբանելու իրավունք չունեմ: Իսկ ինչ վերաբերում է խախտումներ անողներին, ապա այսօր ցանկացած կայք կարող է 200-300 հոգու անուն հրապարակել, 50 պատգամավորի անուն գրել: Համենայնդեպս դրանք պետք է իրականությանը համապատասխանեն:
