«Առաջին լրատվական»-ի զրուցակիցն է ԱԺ «Բարգավաճ Հայաստան» խմբակցության քարտուղար Վահե Էնֆիաջյանը:
– Պարոն Էնֆիաջյան, «Բարգավաճ Հայաստան» կուսակցությունը կողմ քվեարկեց 2016թ. բյուջեին: Այդպիսով դուք, փաստորեն, Հանրապետական կուսակցության հետ միասին կիսո՞ւմ եք հաջորդ տարվա սոցիալ-տնտեսական ծանր վիճակը, ինչն էլ արտացոլված է եկող տարվա գլխավոր ֆինանսական փաստաթղթում:
– Ձեզ պետք է վստահեցնեմ, որ «Բարգավաճ Հայաստան» կուսակցությունը երբեք պատասխանատվությունից չի վախեցել, մենք շատ լավ հասկանում ենք, թե ինչպիսի մեծ պատասխանատվություն կա մեր քաղաքական ուժի վրա: Այդ պատասխանատվությունը միանշանակ եղել և մնում է մեր լիազորությունների ու հնարավորությունների շրջանակում, գործընթացներին մեր մասնակցությանը համահունչ: ԲՀԿ-ում այս հարցի վերաբերյալ մենք մանրակրկիտ քննարկումներ ենք իրականացրել: Բնականաբար, սա լրջագույն փաստաթուղթ է, որը պետք է արտացոլի մեր հետագա սոցիալ-տնտեսական մի շարք խնդիրներ, ծրագրեր: Եվ մենք գտնում ենք, որ այս փաստաթղթում կա իրատեսություն, այս փաստաթղթում կա կայունություն, դրա համար էլ մենք կողմ ենք քվեարկել: Բայց դրան զուգահեռ, մենք խոսել ենք և խոսելու ենք մի շարք խնդիրների ու բացերի մասին: Եվ գտնում ենք, որ պետք է մտահոգված լինենք գոյություն ունեցող բազմաթիվ խնդիրներով, և պետք է ականջալուր լինեն մեր կողմից առաջարկված խնդիրներին: Միևնույն ժամանակ, սա համադրելի փաստաթուղթ է, սա լավատեսություն հաղորդելու փաստաթուղթ չէ, սա պետք է իր մեջ իրատեսություն պարունակի, և իրատեսական է՝ համեմատած նախկին բյուջեի հետ, որին մենք դեմ ենք քվեարկել:
– Նախկին ասելով՝ 2015թ. բյուջե՞ն նկատի ունեք:
– 2013-2014 թվականների բյուջեները: Այն մտահոգությունները, որոնք մենք ունեցել և բարձրաձայնել ենք, շատ տեղին են եղել: Ու ավելի քան համոզված եմ, որ ներկայիս փաստաթղթի նկատմամբ վերաբերմունքը շատ ճիշտ էր, քանի որ այն կառավարության կողմից շատ պատշաճ և ներկայանալի էր ներկայացված: Սա փաստաթուղթ էր իրատեսության շրջանակներում: Մենք շատ լավ հասկանում ենք, թե մեր երկիրը զարգացման ինչ հնարավորություն ունի: Եվ նախորդների դեպքում այն թվերը, որոնք հրապարակվում էին տնտեսական աճի համար, բայց չէին կարողանում իրականացնել, դա էլ մեր երկրին հուսահատության, դժգոհության էր բերում:
– 2015թ. բյուջեն էլ 4 տոկոս տնտեսական աճ էր խոստանում, բայց կրկնակի անգամ քիչ է ապահովվում: Չե՞ք հիասթափվել:
– Այս բյուջեն իրատեսական է և չկան, օրինակ, այսպիսի կետեր՝ բիոզուգարանների գաղափար, խորհրդատվություն:
– Այնուամենայնիվ, կողմ քվեարկելով բյուջեին՝ ի՞նչ պատասխանատվություն եք ստանձնելու:
– Քաղաքական միավորը ցանկացած քաղաքականություն իրականացնելիս իր ներկայացուցչական մասն ունի խորհրդարանում և իր մասնակցության չափով էլ պատասխանատվություն է կրում: Այսօրվա դրությամբ մեր քաղաքական միավորն իր քվեարկությամբ, իր մոտեցումներով, իր ծրագրային դրույթներով և իր ներգրավվածությամբ այսօրվա քաղաքական իրավիճակում այդ չափով էլ, բնականաբար, պատասխանատվություն ունի:
– Այսինքն՝ ՀՀԿ-ի հետ կիսում եք այն պատասխանատվությունը, որ 2016 թվականը տնտեսապես վատ տարի է լինելու:
– Տնտեսության մեջ կան մի շարք խնդիրներ, որոնք օրհասական են և պետք է լուծում ստանան: Մենք բազմիցս ասել ենք, թե ինչպես կարելի է ավելի արդյունավետ ու ավելի արագ տեմպերով զարգացնել, որպեսզի տնտեսության, սոցիալական խնդիրները լուծվեն:
– 2016թ. բյուջեն նախատեսո՞ւմ է այդ լուծումները, որ դուք դրան կողմ քվեարկեցիք:
– Մենք առհասարակ գտնում ենք, որ տնտեսության մեջ կան մի քանի գործոններ, նախադրյալներ՝ երաշխիքներ պիտի լինեն, որպեսզի հնարավոր լինի զարգացում ապահովել: Այն վատթարացող տեմպը, որն արդեն արձանագրված է Հայաստանի տնտեսության մեջ, պետք է կայունացնել, պետք է հավասարակշռել, հետո նոր կարողանալ ստեղծված իրավիճակում քայլ առ քայլ նույն իրատեսության շրջանակներում առաջ գնալ և չվախենալ դրա մասին խոսելուց, ժողովրդի հետ բաց լինելուց և իրական պատկերը հասկանալուց:
– Այս բյուջեն տալի՞ս է այդ հնարավորությունը:
– Այս բյուջեն արդեն այդ իրատեսությունն ու թափանցիկ մոտեցումն է: