«Առաջին լրատվական»-ի զրուցակիցն է ֆինանսների փոխնախարար Պավել Սաֆարյանը։
– Պարոն Սաֆարյան, կարելի՞ է ասել, որ 2016թ. ունենալու ենք բավականին դժվար և սոցիալապես անապահով տարի:
– Եթե դուք դա դիտարկում եք բյուջետային քննարկումների շրջանակում, ապա կարելի է ասել, որ սոցիալական բարելավումների տարի չի լինելու:
– Դատելով այն հանգամանքից, որ թոշակներն ու աշխատավարձերը չեն բարձրանալու, բայց գնաճ է լինելու, կարո՞ղ ենք եզրակացնել, որ 2016թ. Հայաստանն ավելի աղքատ է լինելու:
– Ճաշակի խնդիր է: Սոցիալական տեսակետից կարելի է բնութագրել որպես կայունության տարի: Կայունություն է լինելու, սոցիալական ցուցանիշների իջեցման առումով որևէ վերանայում չի լինելու: Կայուն է լինելու, որովհետև ի տարբերություն շատ երկրների, որոնք վերանայել են իրենց սոցիալական ցուցանիշները՝ մասնավորապես իրականացրել են աշխատավարձի իջեցումներ, թոշակային տարիքի բարձրացումներ, մենք նման քայլեր չենք արել: Եթե դա համադրում ենք գնաճի հետ, այդ երկրներում ավելի անկայուն վիճակ է: Գնաճը կարող է ունենալ բացասական հետևանքներ, բայց բյուջետային տեսակետից սոցիալական ցուցանիշների իջեցում չի լինելու
– Իսկ դուք վստա՞հ եք, որ եկամուտները կհավաքվեն, և այդ կայունությունը կապահովվի:
– Իմ վստահությունը հիմնված է այն մեխանիզմների, այն մոդելների վրա, որոնք այսօր գոյություն ունեն աշխարհում, և որոնք կարողանում են կանխատեսում ապահովել՝ հաշվի առնելով բոլոր գործոններն ու տեսնել, թե ինչպիսի ֆինանսական ցուցանիշներ կլինեն: Բայց կան նաև անորոշության գործոններ, և մենք չունենք դրանց մասին պատկերացում կազմելու հնարավորություն: Ու թե ինչպիսին կլինեն դրանք՝ դրական, թե բացասական միտումներով, հնարավոր չէ կանխատեսել:
– Դրական ազդակներ կարծես թե դեռ չկան:
– Մենք նկատի ունենք ներքի՞ն ազդակները, թե՞ արտաքին ազդակները:
– Թե՛ ներքին, թե՛ արտաքին ազդակները:
– Պետք է հիմնավորել, թե արտաքին ազդակների դեպքում ինչու չկան դրական սպասումներ: Կան վերլուծություններ, որոնք թե՛ դրական, թե՛ բացասական ելքեր են տեսնում: Օրինակ՝ նավթի գնի ու տնտեսության վրա դրա ազդեցության վերաբերյալ կան տարբեր մոտեցումներ և տարբեր գնահատականներ: Կան մոտեցումներ, թե հաջորդ տարի նավթի գները բարձրանալու են, կայունանալու են, և կան վերլուծություններ, որ իջնելու են: Նույնն էլ ներքին ազդակների դեպքում:
