Freedom House միջազգային իրավապաշտպան կազմակերպությունը նախազգուշացրել է, որ Ուկրաինայում խախտվում են ժողովրդավարական իրավունքներն ու ազատությունները, և վերջին տարվա ընթացքում երկրում ավտորիտար համակարգի հաստատման վտանգ է առաջացել: Այս մասին հաղորդում է Interfax գործակալությունը:
«Ուկրաինայում Վիկտոր Յանուկովիչի նախագահության մեկ տարվա ընթացքում այդ երկիրը վերապրել է ժողովրդավարական պրակտիկայի և մարդու իրավունքների պաշտպանության նվազման փուլ, և եթե այս միտումները չկանգնեցվեն, ապա այն կարող է վերադառնալ մինչև նարնջագույն հեղափոխությունը եղած ավտորիտար համակարգին»,- ասվում է Freedom House-ի զեկույցում, որը նվիրված է Ուկրաինայում ժողովրդավարության պաշտպանությանը:
Փաստաթղթում նշված են մի քանի հատկանշական գործոններ վերոնշյալ վտանգների համար` ճնշումը ԶԼՄ-ների վրա, հետապնդումները նախընտրական շրջանում, հատուկ ծառայությունների միջամտությունները, քննադատություն է հնչել տեղական ընտրությունների անցկացման կապակցությամբ և այլն:
«Ներկայիս կառավարության օրոք երկիրը շարժվում է սխալ ուղղությամբ, եթե խոսքը վերաբերում է ժողովրդավարությանը և մարդու իրավունքներին»,- ասել է համազեկուցողներից մեկը` Դեյվիդ Քրամերը:
