Չորրորդ «կլասիկո»-ն ետևում է: Նախորդ երեք «կլասիկո»-ներում մրցակիցներն ապացուցել էին, որ արժանի են միմյանց: Սկզբում «Բարսա»-ի ջախջախիչ հաղթանակը` 5:0, այնուհետև «Ռեալ»-ի հաղթանակը Իսպանիայի գավաթի խաղարկության եզրափակիչում և դրանց միջև ընկած ոչ ոքին:
Հաշվի առնելով նախորդ երկու խաղերի հաջող արդյունքը` Ժոզե Մոուրինյոյի կատարած փոփոխությունները միայն ստիպված էին. «Ռեալ»-ը կրկին խաղադաշտ դուրս եկավ առանց առաջ քաշված հարձակվողի:
Գվարդիոլան, որը նույնպես լուրջ կադրային խնդիրներ ուներ, ճարահատյալ էր ավելի պաշտպանողական կազմ դուրս բերել խաղադաշտ:
Առաջին խաղակեսն անցավ չափազանց լարված պայքարում: Երկու թիմերն էլ ավելի շատ ուշադրություն էին դարձնում պաշտպանությանը: Եթե «Բարսելոնա»-ն երկու քիչ թե շատ վտանգավոր պահ ստեղծեց Կասիլիասի դարպասի մոտ, ապա «Ռեալ»-ն ընդհանրապես մոռացել էր հարձակվելու մասին:
Ընդմիջման գնալիս լարվածությունը հասավ գագաթնակետին. «կատալոնացիներ»-ի պահեստային դարպասապահ Խոսե Պինտոն ու «Ռեալ»-ի մարզչական շտաբը ինչ-որ բան չկիսեցին: Արդյունքում դարպասապահը կարմիր քարտի արժանացավ ու հեռացվեց պահեստայինների նստարանից:
Երկրորդ խաղակեսը շատ ավելի ակտիվ սկսեցին թիմերը: Անկասկած, դրան նպաստեց Մոուրինյոյի կատարած փոփոխությունը: Պորտուգալացին առաջին խաղակեսում ոչնչով աչքի չընկած Օզիլին փոխարինեց Ադեբայորով:
Հանդիպման բեկումնային պահը տեղի ունեցավ 61-րդ րոպեին. Պեպեն մրցակցի տուգանայինի մատույցներում պրեսինգի ժամանակ անչափ կոպիտ խախտում կատարեց Դանի Ալվեշի նկատմամբ և գլխավոր մրցավար Վոլֆգանգ Շտարկը իրավացիորեն կարմիր քարտ ցույց տվեց պորտուգալացուն: Ժոզե Մոուրինյոն, բնականաբար, ծանր տարավ Պեպեի հեռացումը, ինչի արդյունքում նա նույնպես պատժվեց կարմիր քարտով ու լքեց պահեստայինների նստարանը:
Գվարդիոլան մտածելու շատ բան չուներ: Միակ ֆուտբոլիստը, որ կարող էր էականորեն ուժեղացնել թիմի հարձակումը, Իբրահիմ Աֆելայն էր: Շուտով հոլանդացին հայտնվեց խաղադաշտում Պեդրոյի փոխարեն: Գվարդիոլան կռահեց. ոչ թե Աֆելային խաղադաշտ դուրս բերելով, այլ նրան աջ եզրում խաղացնելով (սովորաբար հոլանդացին խաղում է ձախ եզրում): 76-րդ րոպեին Իբրահիմը աջ եզրով հրաշալի անցում կատարեց և փոխանցում կատարեց տուգանային հրապարակի կենտրոն շտապող Մեսսիի ուղղությամբ, արգենտինացին երեք պաշտպանների արանքից հաջողացրեց դիպուկ հարվածով գնդակը Կասիլիասի ոտքերի արանքով ուղարկել դարպաս` 0:1: Որքան էլ տարօրինակ է` Մոուրինյոն անգամ չփորձեց ուժեղացնել իր թիմի հարձակումը: Կատալոնացիներին էլ ամբողջությամբ ձեռնտու էր հաշիվը, և նրանք մեծ ուժերով չէին գրոհում: Թվում էր թիմերը համակերպվել են 0:1-ի հետ, և խաղն այդպես էլ կավարտվի, սակայն 87-րդ րոպեին վերջին ժամանակների աշխարհի լավագույն ֆուտբոլիստ Լեո Մեսսին խաղադաշտի կենտրոնում ստացավ գնդակն ու խելահեղ արագությամբ շարժվեց առաջ, ճանապարհին իրեն հատուկ թեթևությամբ շրջանցելով երեք պաշտպանների, խփեց այս մրցաշրջանում իր 52-րդ գնդակը` 0:2:
«Բարսելոնա»-ն վստահ հաղթանակ տարավ Մադրիդում, ու այժմ արքայական ակումբին միայն հրաշքը կօգնի դուրս գալ եզրափակիչ:
