Չորեքշաբթի Հնդկաստանի Փենջաբ նահանգի ոստիկանությունը ձերբակալել է երեք մարդու, որոնք փորձել են Facebook սոցիալական ցանցի միջոցով նորածին երեխա վաճառել: Այս մասին հաղորդում է RIA Novosti-ն՝ վկայակոչելով տեղի ԶԼՄ-ները:
Ապրիլին երեխայի ծնվելուց հետո ձերբակալվածներից մեկը՝ Ֆերոզ Խանը, նորածնի մորն (իր ամուսնալուծված դստերը) ասել է, որ երեխան մահացած է ծնվել: Այնուհետև նա երեխային 830 դոլարով վաճառել է հիվանդանոցներից մեկի աշխատակցին: Վերջինս երեխային 5500 դոլարով վաճառել է նույն հիվանդանոցի լաբորատորիայի աշխատակցին, որը Facebook սոցիալական ցանցի միջոցով կապ է հաստատել Դելիից գործարարի հետ և առաջարկել է երեխային գնել 14700 դոլարով:
Երեխայի մորը տարօրինակ է թվացել իր հոր եկամուտների կտրուկ աճը, և նա դիմել է ոստիկանություն: Իրավապահ մարմինները դրանից հետո ձերբակալել են գործարքի բոլոր մասնակիցներին և երեխային վերադարձել են մորը:
Ներկայում ոստիկանները փնտրում են գործարարին: Ձերբակալվածների դեմ ներկայացվել է մարդ առևանգելու մեղադրանք, նրանց սպառնում է մինչև 7 տարվա ազատազրկում: