Սահմանադրական փոփոխությունների հանրաքվեին մնացել է ուղիղ 10 օր, սակայն դեռևս շարունակվում է ցածր մնալ հասարակության իրազեկվածության աստիճանը:
Կոտայքի մարզի Նոր Հաճըն քաղաք կատարած մեր այցելությունը ևս մեկ անգամ ապացուցեց, որ հասարակության շրջանում ոչ միայն ցածր է իրազեկվածության աստիճանը, այլև հետաքրքրվածությունը առաջիկա համապետական ընտրությունների նկատմամբ:
Ըստ Նոր Հաճընի բնակիչների՝ իրենց ոչ նախագիծ են բաժանել, ոչ էլ քարոզչական հանդիպումներ են եղել քաղաքում:
Քարոզչական հանդիպումների բացակայության պատճառը փորձեցինք ճշտել քաղաքի «Այո»-ի շտաբներից, սակայն ապարդյուն. «Բարգավաճ Հայաստան»-ի գրասենյակում տեղակայված «այո»-ի շտաբը փակ էր:
Այցելեցինք նաև մոտակա Նոր Գեղի գյուղը: Գյուղի բնակիչների հետ զրույցից ճշտեցինք, որ գյուղում կա 1 «այո»-ի շտաբ, իսկ թե ինչ գործունեությամբ են զբաղվում շտաբում՝ գյուղացիները տեղյակ չեն. իրենց հետ ոչ հանդիպել են, ոչ էլ որևէ քարոզչական թերթիկներ բաժանել:
Եթե գյուղացիները պնդում էին, որ գյուղում քարոզչություն չի ընթանում, ապա գյուղապետարանում բոլորովին այլ լուրեր էին պտտվում: Թեև գյուղապետն իր խոսքում խոստովանեց, որ քարոզչական գործընթացից անմասն չի մնացել անգամ տեղի դպրոցը, սակայն հետո իր խոսքը սխալ որակելով՝ ասաց, որ շփոթվել է:
Նոր Գեղի բնակիչների խոսքերից՝ թե գյուղում առհասարակ քարոզչություն չի ընթանում, ու գյուղապետի ակտիվ քարոզարշավի մասին պատմություններից հետո որոշեցինք այցելել «այո»-ի քարոզչական շտաբ:
Գյուղապետի խոսքով՝ առավոտյան 9-ից երեկոյան 6-ը աշխատող ու մոտ 25 քարոզիչներ ունեցող շտաբը փակ էր: Բացվելուց հետո էլ շտաբի աշխատակիցները եկան ու ասացին այն, ինչ գյուղապետն էր ասել մեզ հետ զրույցում՝ գյուղում ընթանում է թեժ քարոզչական գործընթաց:
