«Մեր երկիրը, ըստ էության, կառավարվում է մոնետարիզմով, որն էլ կեղծ գիտություն է. այն ստեղծվել է դեռևս 1944 թ.-ին, որպեսզի մեր նման ճորտ, չէ` մեր նման չէ, ճորտ երկրներին ընդհանրապես ճորտացնեն, և տնտեսական համակարգի զարգացումը պայմանավորված լինի փողով` նկարված թղթեր, որոնցով տնտեսական զարգացում տեղի չի ունենում»,- այսօրվա ասուլիսին հայաստանյան տնտեսական համակարգը բնութագրելով` նկատեց Վարդան Բոստանջյանը և ընդգծեց, որ չէր ուզենա այս ամենը հեռուստացույցով լիներ:
Բոստանջյանը նաև նկատեց, որ Հայաստանի տնտեսությունն այսօր գնում է ստագնացիայի:
Արամ Կարապետյանն էլ նկատեց, որ կառավարությունը վերջին մեկ տարվա ընթացքում զբաղվում է երկրում օպերատիվ կառավարմամբ. «Այսինքն՝ որ հաց լինի, տրանսպորտը աշխատի»:
Նրա խոսքերով, երբ երկրում տնտեսությունը ստագնացիայի է գնում՝ ամբողջությամբ խեղդամահ լինելու եզրին է կանգնած. պետք է գործեն ոչ թե կոալիցիոն կառավարությունները, այլ մասնագիտական խմբերը:
Մի քանի հազար անդամ ունեցող կուսակցությունն էլ կարող է մասնագետի խնդիր ունենալ դիտարկմանն ի պատասխան Բոստանջյանը նշեց, որ անգամ եթե կուսակցության անդամների քանակը շատ մեծ լինի, հնարավոր է, որ գործադիր առումով չկարողանան ընտրել կամ սուբյեկտիվ պատճառներով առաջարկեն սխալ մասնագետի. «Ես տեսականորեն համաձայն եմ:
Կառավարությունն անցած տարիների ընթացքում, ամենայն հավանականությամբ, գտնվելով ֆինանսական ճգնաժամի մեջ, անշուշտ, որակական կառավարման առումով չի գտնվել բարձունքում և, բնականաբար, օպերատիվ բնույթի խնդիրներ գոնե պետք է լուծեր»:
Բոստանջյանը նաև համաձայնեց Կարապետյանի այն դիտարկման հետ, որ պետական կառավարման մեջ էլ կան «տրագիկ կերպարներ». «Այսինքն` մարդը, որը պատրաստ է եղել ԿԲ–ում աշխատել, հիմա դարձել է վարչապետ, որտեղ իր գլխավոր խնդիրը եղել է վարկավորումը, փող բերելը, և հիմա, կարծում եմ, պետք է կտրուկ փոփոխություններ լինեն»։
