Թուրքական Star թերթի փոխանցմամբ՝ Թուրքիայի կողմից ռուսական «Սու-24» ինքնաթիռի խոցումից հետո ռուս պաշտոնյաները սկսել են խոսել Թուրքիայի հանդեպ պատժամիջոցների մասին։ Այդ ֆոնին Թուրքիան անցել է գործի և մշակել տնտեսական ոլորտի B և C պլաններ, որոնք առնչվում են էներգետիկ և առևտրային հարաբերություններին։
Երկկողմ հարաբերություններում գերակայում է էներգետիկան, զարգացած է նաև արդյունաբերական ու գյուղատնտեսական ապրանքների առևտուրը։
Թուրքիան պատրաստվում է Ռուսաստանի կողմից գազի հնարավոր մատակարարումների կասեցմանը։ Թուրքիայի ներկրած գազի 55 տոկոսը բաժին է ընկել Ռուսաստանին։ Եթե Ռուսաստանը գնա այդ քայլին, ապա Թուրքիան կմեծացնի Ադրբեջանից ու Իրանից գազի մատակարարումը։
Բացի այդ, Թուրքիան կմեծացնի Ալժիրից, Նիգերիայից ու Քաթարից հեղուկացված գազի ներկրումը։ Աշխատանքներ կտարվեն գազապաստարանների հնարավորությունների մեծացման ուղղությամբ։ Թուրքիան արագացնելու է Հյուսիսային Իրաքից գազի ներկրման գործընթացը, որն ավելի էժան կլինի՝ ռուսական գազի հետ համեմատ։ Թուրքիան պլանավորում է մեծացնել Իրաքից նավթի ներկրումը, որին 2018 թվականին բաժին է ընկնելու նավթի ներկրման 1/3-ը։
Ինչ վերաբերում է Ռուսաստանի հետ արտաքին առևտրի մյուս ճյուղերին, ապա Թուրքիան Ռուսաստանի հնարավոր կորուստը կփոխհատուցի Ասիա-խաղաղօվկիանոսյան տարածաշրջանի երկրների (Չինաստան, Ճապոնիա, Մալայզիա, Սինգապուր, Ինդոնեզիա, Հարավային Կորեա), Աֆրիկայի ու Լատինական Ամերիկայի և Կարիբյան ավազանի երկրների հետ առևտրային հարաբերությունների մեծացմամբ։
Թուրքիան նաև պլանավորում է ավելի խորացնել Կովկասի ու Միջին Ասիայի երկրների հետ առևտրային հարաբերությունները։ Ընդհանրապես Թուրքիան պլանավորում է մեծացնել իր դեսպանատների թիվը՝ առևտրային հարաբերությունները զարգացնելու համար։
Հիշեցնենք, որ 2010 թվականի հոկտեմբերին առաջին անգամ Նախիջևան այցելած Թուրքիայի արտաքին առևտրի հարցերով պետնախարար Զաֆեր Չաղլայանը հայտարարել էր. «Մենք առևտրային հարաբերությունների զարգացման համար հետևում ենք բոլոր երկրների դիվանագիտությանը։ Մենք դա անվանում ենք «առևտրային դիվանագիտություն»։
