Ինչպես տեղեկացրել էինք, մայիսի 22-ին Արագածոտնի մարզի Տեղեր գյուղում տեղի են ունենալու համայնքի ղեկավարի ընտրություններ: Տեղեր գյուղի գյուղապետի թեկնածու Լևոն Ստեփանյանը մեզ հետ զրույցում, պատասխանելով այն հարցին, թե ինչո՞վ է պայմանավորված գյուղապետի պաշտոնում իր թեկնածության առաջադրումը, ասաց, որ գյուղում իրականացնելու մեծ ծրագրեր ունի՝ հատկապես առանձնացնելով ջրի և գյուղապետրանի խնդիրը: Բանն այն է, որ, ըստ նրա, գյուղում ո՛չ խմելու ջրի աղբյուրներ կան, ո՛չ ոռոգման ջրի խնդիրն է լուծված, ո՛չ էլ գյուղտեխնիկա կա: Ավելին֊, գյուղում գյուղապետարանի շենք չկա:
«Արդեն երրորդ գյուղապետն է փոխվում, բայց ոչ ոք չի նախաձեռնել, որ գյուղում գյուղապետարանի շենք հիմնվի, որ աշխատողները աշխատելու տեղ ունենան:
Յուրաքանչյուրը տանը նստած, կնիքն իրենց մոտ դրած՝ աշխատում են: Դրա համար ցանկանում եմ իմ թեկնածությունը դնել, որ գյուղի այս բացերը լրացնեմ»:
Մեր հարցին՝ իսկ կուսակցությունը ո՞ր թեկնածուին է պաշտպանում, Լևոն Ստեփանյանը պատասխանեց, որ կուսակցությունը պաշտպանում է մյուս հանրապետականի՝ Գառնիկ Հովհաննիսյանի թեկնածությունը:
Նաև դժվարացավ պատասխանել, թե նման պայմաններում ինքը գյուղապետ ընտրվելու շանսեր կունենա՞, թե՞ ոչ: Ամեն դեպքում ավելացրեց, որ իր ընտրվելու շանսերը բավարար են:
Ի դեպ, Տեղեր գյուղը ունի 181 ընտրող, որից 26-ը դրսում են: Իսկ Լևոն Ստեփանյանը ունի բարձրագույն կրթություն, զինվորական է, գնդի հրամանտարի տեղակալ է աշխատել Շահումյանի 25/ 145 զորամասում: Անցել է թոշակի և առաջադրել իր թեկնածությունը գյուղապետի պաշտոնում:
