Ջոհար Ցարնաևը, որը կասկածվում է Բոստոնի մարաթոնի ժամանակ տեղի ունեցած ահաբեկչության կազմակերպման մեջ, գիտակցության է եկել և գրավոր պատասխանել մի շարք հարցերի: Այս մասին հայտնում է ABC News-ը՝ հղում անելով իրավապահ մարմինների աղբյուրին:
Ավելի վաղ իրավապահ մարմինների պաշտոնական ներկայացուցիչները հայտարարել էին, որ 19-ամյա Ջոհար Ցարնաևը, որը ձերբակալման պահին ծանր վնասվածք էր ստացել, առողջական վիճակի պատճառով դեռևս չի կարող ցուցմունք տալ: Բացի այդ, հաղորդվել է, որ կոկորդի վնասվածքի պատճառով Ցարնաևը կարող է մեկընդմիշտ զրկվել ձայնից:
Եղբայրներից ավագը՝ Թամերլանը, որը բնակվել է Մասաչուսեթս նահանգի Քեմբրիջ քաղաքում, չի դիմել իր բնակավայրը սպասարկող ոստիկանություն՝ զենքի լիցենզիայի համար: Նա լիցենզիա էր ստացել Մասաչուսեթսի այլ հատվածից, սակայն նահանգի օրենքները պարտադրում էին նրան գրանցել փաստաթուղթը Քեմբրիջում, ինչը նա չի արել: Իրավապահ մարմինների փոխանցմամբ՝ Ջոհար Ցարնաևը չէր կարող օրինական կերպով զենք ունենալ տարիքի պատճառով: Ատրճանակ նրան կարող էր տրամադրվել միայն 21 տարեկանից:
Նահանգի 21-ից ցածր տարիքի բնակիչները, լրացնելով նախնական հատուկ հավաստագիրը, կարող են ունենալ միայն հարթափող հրացան՝ սահմանափակ փամփշտակալով, կամ տրավմատիկ զենք: Նման զենք ունենալու հավաստագիր Ցարնաև կրտսերը չի լրացրել:
Այն փաստը, որ եղբայրները զենք են կրել ապօրինաբար, կարող է նոր խթան հաղորդել զենքի շրջանառության նկատմամբ վերահսկողության խստացման անհրաժեշտության մասին քննարկումներին:
