ԱՄՆ-ը որոշել է կրկնապատկել սիրիական ընդդիմությանը ցուցաբերվող օգնության ծավալը և ընդլայնել մատակարարվող ապրանքների ցուցակը: Այս մասին ասվում է ԱՄՆ Պետդեպի մամլո ծառայության հաղորդագրությունում՝ կապված Ստամբուլում «Սիրիայի բարեկամներ» խմբի հանդիպման հետ: Հանդիպմանը մասնակցում է նաև ԱՄՆ պետքարտուղար Ջոն Քերին: Այս մասին հայտնում է ITAR-TASS-ը:
Ինչպես հստակեցրել է արտաքին քաղաքական գերատեսչությունը, Վաշինգտոնը պատրաստվում է կրկնապատկել սիրիական ընդդիմության օգնության ծավալները՝ այդ նպատակի համար հատկացնելով ևս 123 մլն դոլար: Այդպիսով՝ Բարաք Օբամայի վարչակազմը կտրամադրի 250 մլն դոլար՝ «ոչ մահաբեր» ռազմական տեխնիկայի և դեղորայքի մատակարարման վրա:
Պետդեպի հայտարարությամբ՝ այդ օգնությունը կփոխանցվի սիրիական ընդդիմության «Գերագույն զինվորական խորհրդին»:
Ստամբուլում Քերին հանդիպման մյուս մասնակիցներին կոչ է արել իրենց վրա վերցնել համանման պարտականությունները՝ խմբի կողմից ընդդիմության աջակցության մասշտաբները 1 մլրդ դոլարի հասցնելու համար, ծանուցում է Պետդեպը: ԱՄՆ-ը պարտավորվել է սննդամթերքի հավելյալ օգնության տրամադրման համար մոտ 25 մլն դոլար տրամադրել սիրիացի ժողովրդին: Օգնությունն իր մեջ ներառում է 25 հազար տոննա հացահատիկ:
