Թուրքական Dünya Bülteni լրատվական կենտրոնի փոխանցմամբ՝ Թուրքիան ռուսական ավիացիայի կողմից Սիրիայում թուրքմենական գյուղերին հարվածելու հարցը տեղափոխելու է ՄԱԿ-ի հարթություն։
Տվյալ հարցը քննարկվել է Թուրքիայում երեկ գումարված անվտանգության խորհրդի նիստում, որը նախագահել է երկրի վարչապետ Ահմեթ Դավութօղլուն։ Նիստից հետո Դավութօղլուն հայտարարել է, որ ԴԱԻՇ-ի դեմ գործողության անվան տակ չպետք է հարվածի տակ ընկնեն խաղաղ քաղաքացիները։
Դավութօղլուի խոսքով՝ Թուրքիան պաշտպանելու է իր «եղբայր» թուրքմեններին և թույլ չի տա, որ նրանց սպանդի ենթարկեն։
Լրատվամիջոցը հայտնել է, որ Թուրքիան ցանկանում է, որ թուրքմենների բնակավայրերին ռուսական ավիացիայի հարվածելու հարցը քննարկվի ՄԱԿ-ի ԱԽ-ում։ Ավելի վաղ Անկարայում Ռուսաստանի դեսպանը կանչվել է Թուրքիայի ԱԳՆ, ուր նրան հայտնել են, թե Թուրքիան ցանկանում է, որ Ռուսաստանն անհապաղ դադարեցնի թուրքմենների դեմ իր գործողությունները։
Հիշեցնենք, որ ավելի վաղ թուրքական մամուլը գրել էր, թե Թուրքիայի Ազգային հետախուզական կազմակերպության (MIT) ջանքերով ձևավորվել է «թուրքմենական բանակ», որը բաղկացած է 5000 մարդուց։
