Սահմանադրական փոփոխություններին «Ոչ» ասող ուժերը սկսել են գովազդային արշավը, օգտագործում են նաև անվճար եթերաժամը: Ասելիքը հիմնականում մեկն է, եթե «Այո» եք ասում սահմանադրությանը, «Այո» եք ասում Սերժ Սարգսյանի և Հանրապետականների վերարտադրությանը: Տարբերությունը միայն այն է, որ, օրինակ, «Նոր Հայաստան» հանրային փրկության ճակատը առաջարկում է անհնազանդությամբ հեռացնել իրենց ձևակերպմամբ ռեժիմին, որպեսզի հանրաքվեն չկայանա, «Ոչի» մյուս ճակատն էլ՝ «Չեք անցկացնին», առաջարկում է գնալ հանրաքվեին ոչ ասել և տեր կանգնել ձայներին: Քաղտեխնոլոգ Արմեն Բադալյանի կարծիքով՝ ընդդիմության թե՛ գովազդային արշավում և թե՛ առհասարակ ծրագրերում նորություններ չկան, այսպես ասած՝ հին երգն են երգում:
Հոգեբան Սամվել Խոդոյանի կարծիքով էլ՝ ընդդիմությունը այլ ելք չուներ, հին երգը պիտի երգեր, քանի որ մարդկանց մեծամասնությունը չի հասկանում, թե սահմանադրական փոփոխությունը ամբողջապես իրենից ինչ է ենթադրում, հետաքրքրված չէ:
Հոգեբանը միաժամանակ շեշտում է՝ ընդդիմության «Ոչ» ասելու եղանակը քչերի վրա կազդի, ոչ նրա համար, որ մեթոդը լավ է, այլ խնդիրը հենց քարոզողների մեջ է:
Քաղտեխնոլոգ Արմեն Բադալյանի դիտարկմամբ՝ պետք է նոր ճանապարհ գտնել «Ոչ»-երին համախմբելու համար, որովհետև դեկտեմբերի 6-ի պարտությունը միայն ընդդիմության պարտությունը չի լինելու, հասարակությունը վերածվելու է ուղղակի բնակչության:
Քաղտեխնոլոգի բնորոշմամբ՝ այս փուլում իշխանափոխության մասին խոսելը չի կարող տապալել հանրաքվեին պարզ պատճառով. իշխանափոխություն եզրույթը մեզանում հասցրել է չարչրկվել:
