Թուրքական Son dakika լրատվական կայքի փոխանցմամբ՝ թուրք-սիրիական սահմանին կենտրոնացված տանկերն ու զրահամեքենաներն իրենց հրանոթների փողերը շրջել են Սիրիայի ուղղությամբ։ Դրան զուգահեռ՝ «Մեհմեթչիքը» (թուրք զինվորի փաղաքշական անվանում-1in.am) թույլ չի տալիս, որ սահմանին «թռչուն անգամ թռչի»։
Մինչ միջազգային կոալիցիայի ուժերը Սիրիայում ավիահարվածներ են հասցնում ԴԱԻՇ-ի դեմ, Թուրքիայի զինված ուժերը շրջափակման տակ են վերցրել Սիրիայի հետ սահմանը։
Սահմանի առանցքային կետերում տեղակայվել են T-155 Fırtına հաուբիցներ։ Ակտիվ վիճակում են նաև օդային պաշտպանության համակարգերը։ 24 ժամ պարեկություն են կատարում զինծառայողները, արգելված է մարդկանց ելումուտը։
Սիրիային սահմանակից Հաթայ, Քիլիս, Գազիանթեփ, Շանլըուրֆա, Մարդին ու Շըրնաք նահանգներում զինծառայություն են իրականացնում 65.000 զինծառայող, մոտ 1200 տանկ ու զրահամեքենա։ Թուրք-սիրիական 910 կիլոմետր երկարությամբ սահմանին տեղակայված է 317 սահմանային ամրակետ։
