Մեր երկրում ամենահարուստ կուսակցությունները Հայաստանի հանրապետական և «Բարգավաճ Հայաստան» կուսակցություններն են:
Կենտրոնական ընտրական հանձնաժողովին ներկայացրած գույքի և եկամուտների հայտարարագրից «Առաջին լրատվական»-ը տեղեկացավ, որ ՀՀԿ-ն ամբողջ հանրապետությունում ունի 43 շենք-շինություն՝ ընդհանուր 16 հազ. 434 ք/մ մակերեսով, հողատարածք՝ 2 հա-ից ավելի: Որպես անշարժ գույք ՀՀԿ-ն հայտարարագրել է 2 ԳԱԶ 3110, 1 ՈՒԱԶ, 4 ՎԱԶ և 1 Nissan Pathfinder, իսկ թանկարժեք գույք, ներդրում կամ բաժնեմաս չի հայտարարագրել: Բանկում կուսակցությունն ունի 39 մլն 843 հազ. դրամ խնայողություն: ՀՀԿ-ի տարեկան եկամուտը կազմում է 532 մլն 104 հազ. դրամ, այդ թվում՝ անդամակցության վճարներ և նվիրատվություններ՝ 364 մլն 539 հազ. դրամ, վարձակալության վճարներ՝ 130 մլն դրամ (այդ թվում՝ «Կապանի հանրախանութ» ՍՊԸ-ից, Վայոց Ձորի մարզպետարանից, Վայքի ՍԱՏԲ-ից, Վայքի փաստաբանների պալատից, Վայքի ՏԳԲ-ից, Եղեգնաձորի հարկային տեսչությունից, Վայքի զբաղվածության պետական ծառայությունից), ՀՀ բյուջեից՝ 29 մլն 530 հազ. դրամ, այլ եկամուտներ՝ 8 մլն 35 հազ. դրամ:
ԲՀԿ-ի շենք-շինություններն ու հասարակական տարածքները Երևանում և մարզերում 53-ն են՝ ընդհանուր 6245 ք/մ մակերեսով: Շարժական և 8 մլն դրամը գերազանցող թանկարժեք գույք կուսակցությունը, ըստ հայտարարագրի, չունի, իսկ բանկում ունի 8 մլն 993 հազ. դրամ, որից անցած 1 տարում ստացել է 68.7 հազ. դրամ տոկոս: ԲՀԿ եկամուտները ձևավորվել են նաև պետական բյուջեից՝ 17 մլն 511 հազ. դրամ, և անդամավճարներից՝ 14 մլն 397 հազ. դրամ:
ՀՅԴ-ի գրասենյակները, շենք-շինություններն ու տները Երևանում և մարզերում 35 հատ են՝ ընդհանուր 7684 ք/մ մակերեսով: Կուսակցությունը, բացի անշարժ գույքից և բանկային հաշվեհամարի գումարից՝ 2 մլն 91 հազ. դրամ, այլ բան չի հայտարարագրել՝ ո՛չ շարժական ու թանկարժեք գույք, ո՛չ բաժնեմաս կամ ներդրում, և ոչ էլ «մի քոռ կոպեկ» եկամուտ:
«Հայ ազգային կոնգրես» կուսակցությունը, որն ի դեպ, որպես գրանցման ժամկետ նշել է 2003 թ. նոյեմբերի 24-ը, թեև այս տարի է միայն գրանցվել, իր ունեցվածքով անհամեմատ զիջում է ՀՀԿ-ին ու ԲՀԿ-ին. այն ունի ընդամենը 1 հասարակական նշանակության շինություն Սարյան փողոցում (297 ք/մ), շարժական և թանկարժեք գույք չունի: Բանկում ունի 2 մլն 162 հազ. դրամ: ՀԱԿԿ եկամուտները ձևավորվում են կուսանդամների, նվիրատուների գումարներից և պետբյուջեից՝ ընդհանուր 5 մլն 259 հազ. դրամ:
ՕԵԿ-ի միակ անշարժ գույքը Երևանի Աբովյան փողոցում 765 ք/մ տարածքն է: Կուսակցությունն ունի ՎԱԶ 2107 (1990 թ.) և Opel Vectra (2002 թ.) մակնիշների մեկական ավտոմեքենաներ, թանկարժեք գույք, բաժնեմաս կամ ներդրում չունի, իսկ բանկում 1 մլն 36 հազ. դրամ է հաշվեհամարին: Այս կուսակցության տարեկան եկամուտը կազմել է 13.2 մլն դրամ, որից պետբյուջեից՝ 4 մլն 633 հազ. դրամ, կուսակցության անդամներից՝ 8 մլն 650 հազ. դրամ:
«Բարև Երևան» կուսակցությունների դաշինքը, որ կազմված է «Ժառանգություն», «Ժողովրդավարական հայրենիք», «Ժողովրդավարական ուղի» և «Շրջադարձ» կուսակցություններից, անշարժ, շարժական կամ 8 մլն դրամը գերազանցող որևէ գույք, ներդրումներ չունի: Եկամուտների բաժինը միայն «Ժառանգությունը» և «Ժողովրդավարական հայրենիքն» են լրացրել, այն էլ, իրենց մրցակիցների համեմատ, շատ ավելի փոքր գումարներ: Մասնավորապես, «Ժառանգությունն» անցած 1 տարում ստացել է 25 մլն 666 հազ. դրամ նվիրատվություններ, 4 մլն 387 հազ. դրամ՝ պետբյուջեից, իսկ «Ժողովրդավարական հայրենիքը»՝ 290 հազ. դրամ կուսանդամավճար և 250 հազ. դրամ նվիրատվություն: