Հայաստանի ֆուտբոլի ազգային հավաքականի և Դորտմունդի «Բորուսիա»-ի կիսապաշտպան Հենրիխ Մխիթարյանն անդրադարձել է Եվրոպայի լիգայի «Բորուսիա»-«Գաբալա» խաղին:
«Առաջին գոլի ժամանակ դժվար էր, բայց դրանից հետո մրցակցի պաշտպանությունում դատարկ տեղեր առաջացան: Դա էլ պատճառն էր, որ գրոհեցինք ավելի շատ: Ամեն ինչ ավելի հեշտացավ երկրորդ գոլից հետո: «Գաբալա»-ն լավ թիմ է, ես գիտեմ մարզչին, ճանաչում եմ Զենևին, Բեզոտոսնուն, Անտոնովին ու Վերնիդուբին: Ինչ կապված է Բաքու չմեկնելուն, ապա ես ուզում էի մեկնել: Սակայն անվտանգության նկատառումներով որոշվեց, որ մնալու եմ Դորտմունդում:
Գերմանիայում բազմաթիվ հայրենակիցներ ունեմ, ովքեր հաճախում են «Բորուսիա»-ի խաղերին: Պետք չէ մտածել, որ դա կապված է ադրբեջանական թիմի դեմ խաղի հետ: Հայ երկրպագուները եկել էին ինձ համար, այլ ոչ ադրբեջանական թիմի դեմ»,- ասել է Մխիթարյանը:
Հիշեցնենք, որ Եվրոպայի լիգայի գավաթի խաղարկության խմբային փուլի չորրորդ տուրում Դորտմունդի «Բորուսիա»-ն ջախջախիչ հաղթանակ տարավ ադրբեջանական «Գաբալա»-ի դեմ խաղում։ Հայաստանի հավաքականի կիսապաշտպան Հենրիխ Մխիթարյանը դարձավ գեղեցիկ գոլի և երկու գոլային փոխանցման հեղինակ։
