Շենգավիթ վարչական շրջանի ընդհանուր իրավասության դատարանում Դավիթ Բալայանի նախագահությամբ ավարտվել է Արթուր Ս.-ի և Հովհաննես Գ.-ի գործի դատական քննությունը:
Արարատի մարզի բնակիչներ, 24-ամյա Արթուրը և 27-ամյա Հովհաննեսը մեղադրվում էին խմբի կազմում կատարած խուլիգանության համար՝ ՀՀ քրեական օրենսգրքի 258 հոդվածի 3-րդ մասի 1-ին կետով:
Ըստ մեղադրանքի՝ 2014 թվականի հոկտեմբերի 26-ին, գիշերվա ժամը 1-ի սահմաններում երիտասարդներն այցելել են Նորագավիթում գործող «Միրաժ» գիշերային ակումբ՝ զվարճանալու:
Գտնվելով ոգելից խմիչքի ազդեցության տակ՝ նրանք իրենց սեղանի մոտ են հրավիրել ակումբի պարուհիներին, բայց, ըստ մեղադրանքի, «համապատասխան գումար վճարելու փոխարեն» Արթուրը քաշքշել է պարուհիների ներքնաշորերից, պահանջել է, որ նրանք մերկանան, որպեսզի լիակատար լինի «միրաժի» զգացողությունը:
Պարուհիները մերժել են, չեն մերկացել: Արթուրը զայրացել ու հայհոյել է նրանց:
Հետո տղաների «թիրախում» հայտնվել է ակումբի մատուցողուհին, ով նրանց առաջարկել է հարևան սեղանից տեղափոխվել իրենց սեղանի մոտ ու չաղմկել:
Ցավագին ընդունելով մատուցողուհու առաջարկը՝ Արթուրն ու Հովհաննեսը, ըստ մեղադրանքի, հայհոյել են նաև մատուցողուհու, ապա՝ նրանց կարգի հրավիրելու համար մոտեցած մենեջերուհու հասցեին, ինչպես նաև հայհոյել են անհասցե՝ «իրենց հաճույքի համար»:
Հովհաննեսը, շարունակելով խուլիգանական գործողությունները, բաժակ է նետել մատուցողուհու հետևից: Բաժակը ջարդվել է:
Երկու հաճախորդների բարձրացրած աղմուկի պատճառով ակումբի մնացած հաճախորդները հեռացել են, ակումբի աշխատանքը դադարեցվել է ժամանակից շուտ:
Բայց Արթուրի ու Հովհաննեսի «ելույթը» չի ավարտվել: Բանն այն է, որ նրանք նախապես, գումար չունենալու պատճառով, ակումբում «գրավ էին դրել» բջջային հեռախոս:
Արթուրը չի ցանկացել հեռախոսը թողնել ակումբում, առաջարկել է հեռախոսը փոխարինել ժամացույցով: Սկզբում նա այդ առաջարկն արել է ակումբի մենեջերուհուն, իսկ երբ նա չի համաձայնել՝ ակումբի սեփականատիրոջ որդուն՝ Գարիկին:
Արթուրի առաջարկը չի ընդունվել: Նա ու Հովհաննեսը վիճաբանել են Գարիկի հետ, հայհոյել են նրան: Դրանով էլ չբավարարվելով՝ Արթուրը բռունցքով խփել է Գարիկի դեմքին, սեղմել է նրա պարանոցը՝ պատճառելով թեթև վնաս՝ առողջության կարճատև քայքայումով:
Նույն ժամանակ Գարիկին ձեռքերով ու ոտքերով հարվածներ է հասցրել նաև Հովհաննեսը:
Գիշերային «ելույթի» համար խուլիգանության իրական, ոչ «միրաժային» մեղադրանք է առաջադրվել Արթուրին ու Հովհաննեսին:
Նախաքննության ժամանակ իրենց մեղավոր չճանաչած Արթուրն ու Հովհաննեսը դատարանում ընդունել են իրենց մեղքը, զղջացել են, հայտնել են, թե հարթել են պատճառված վնասը: Գործը քննվել է արագացված ընթացակարգով:
Ամբաստանյալները բնութագրվում են դրական: Այն, որ «Միրաժում» գործողություններ կատարելու պահին եղել են ալկոհոլ օգտագործած վիճակում, հաստատվել էր տուժողի, վկաների ցուցմունքներով, ինչպես նաև այդ օրը ակումբում կատարած նրանց պատվերի վերաբերյալ գրառումով: Նրանց պատվերը, մասնավորապես, գարեջրի մասով՝ գրանցվել էր այսպես. «Կիլիկիա» գարեջուր՝ 1+1+1+1+1+1…
Մեղադրող դատախազը միջնորդել էր Արթուրին ու Հովհաննեսին դատապարտել տուգանքի՝ յուրաքանչյուրին՝ 400 հազար դրամի չափով:
Տուժողը հայտնել է, որ ամբաստանյալներն ամբողջությամբ վերականգնել են իրեն պատճառված վնասը՝ 580 հազար դրամի չափով:
Դատարանը որպես ամբաստանյալների պատասխանատվությունն ու պատիժը ծանրացնող հանգամանք՝ հաշվի է առել, որ նրանք հանցավոր արարքը կատարել են ալկոհոլի ազդեցության տակ, իսկ Արթուրը հանցագործության մեջ ունեցել է առանձնապես ակտիվ դեր՝ նա է քաշքշել պարուհիների ներքնաշորերից, նա է պահանջել, որ պարուհիները մերկանան, նա է սկսել վիճաբանությունը Գարիկի հետ, բռունցքով խփել է նրա դեմքին, սեղմել է պարանոցը՝ տուժողի առողջությանը պատճառելով կարճատև քայքայումով թեթև վնաս:
Դատարանը մեղավոր է ճանաչել ամբաստանյալներին:
Հովհաննես Գ.-ն դատապարտվել է տուգանքի 350 հազար դրամի չափով:
Արթուր Ս.-ն դատապարտվել է 3 ամիս ազատազրկման: Նրա խափանման միջոցը՝ ստորագրությունը չհեռանալու մասին, փոփոխվել է, խափանման միջոց է ընտրվել կալանավորումը: Արթուր Ս.-ն արգելանքի տակ է առնվել հենց դատարանի դահլիճում: