Թուրքական Milliyet թերթի փոխանցմամբ՝ Թուրքիայի վարչապետ Ահմեթ Դավութօղլուի պատվավոր խորհրդական և «Աքշամ» («Երեկո») թերթի հոդվածագիր Էթիեն Մահչուփյանը Al Jazeera Türk-ի հետ զրույցում մեկնաբանել է նոյեմբերի 1-ին Թուրքիայում անցկացված խորհրդարանական արտահերթ ընտրությունների արդյունքները։
Մահչուփյանին մասնավորապես հարցրել են, թե այդ արդյունքները և մասնավորապես «Արդարություն և զարգացում» կուսակցության (ԱԶԿ) կողմից միակուսակցական կառավարություն ձևավորելու հնարավորություն ստանալն ինչպես կազդեն «Քրդական հարցի» կարգավորման վրա։
Մահչուփյանը պատասխանել է, որ այդ հարցում փոխվելու են զրուցակիցները, և որ ԱԶԿ-ն տվյալ հարցի շուրջ չի երկխոսի ո՛չ քուրդ առաջնորդ Աբդուլլահ Օջալանի, ո՛չ էլ քրդամետ «Ժողովուրդների դեմոկրատական» կուսակցության (ԺԴԿ) հետ։ Մահչուփյանը հայտարարել է, որ չի կասկածում, որ «Քրդստանի աշխատավորական» կուսակցությունը (PKK) հետքայլ է անելու, և որ Թուրքիայի կառավարությունը շարունակելու է Սիրիայի քրդերի «Դեմոկրատական միություն» կուսակցության (PYD) դեմ գործողությունները։
Մահչուփյանը կարծիք է հայտնել, որ նոյեմբերի 1-ի ընտրությունների արդյունքները կտրուկ նվազեցրել են Թուրքիայի ներքին հարցերի շուրջ ԱԶԿ-ի կողմից ԺԴԿ-ի հետ երկխոսելու հավանականությունը։
