Վարպետ Գևորգը վաղ առավոտից միչև ուշ երեկո մայրաքաղաքում տաքսի է վարում, ասում է հարյուր հազար դրամից ավելի չվճարված տուգանքներ ունի այն պարագայում , երբ օրական ընդամենը 2500 դրամ է կարողանում վաստակել: Նրա պնդմամբ՝ գրեթե ամեն խաչմերուկում վարորդների համար ծուղակներ կան, օր օրի ավելանում է խախտումները արձանագրող տեսանկարահանող սարքերի թիվը: Վարպետ Գևորգի ներկայացմամբ, եթե Հայաստանում տաքսի վարելուց էլ հրաժարվի, ստիպված կլինի լքել երկիրը ընտանիքը պահելու համար:
«Այգեձոր» տաքսի սերվիսի տնօրեն Սուրեն Մկրտչյանն ամեն օր տաքսու վարորդների իրավախախտումների տուգանքների մասին 30-40 ծանուցում-հարցում է ստանում, եթե տվյալ վարորդը ՃՈ-ի տվյալներով անվճարունակ է, ապա 60 օրվա ընթացքում այն ուղարկվում է տաքսի սերվիսի սեփականատիրոջն իր իսկ անվամբ, որպեսզի նա վճարի այդ տուգանքների համար:
Սուրեն Մկրտչյանը նաև «Աջակցություն տաքսի սերվիսներին» ՀԿ փոխնախագահն է, փաստում է, որ արդեն մեկ ամիս է՝ մի շարք տաքսի ծառայություններում նույն իրավիճակն է: Ըստ նրա՝ տաքսի ծառայությունների սեփականատերերի նկատմամբ անօրինական գործողություններ են կատարում, որպեսզի դաշտում մնան միայն խոշորները: Նշվածն ակնհայտ է, քանի որ ՃՈ-ի կողմից ուղարկած ծանուցումները պարզապես աբսուրդ են, քանի որ տաքսի ծառայությունը չի կարող վճարել բոլոր վարորդների կատարած խախտումների համար: Դրանց ընդհանուր գումարը գերազանցում է մի քանի միլիոն դրամը:
Սուրեն Մկրտչյանը նաև նշեց, որ վարորդներին չի կարող ստիպել, որպեսզի տուգանքները իրենք վճարեն, վարորդները իրենց հերթին պատճառաբանում են, որ գումար չունեն 20-500 խախտման համար, որ վճարեն, այլևս ընտանիք չեն կարող պահել: Աշխատանքից էլ բոլորին հեռացնել չի կարող, օբյեկտիվ պատճառ կա, խախտումների գերակշիռ մասը ծուղակային իրավիճակների պատճառով է, վարորդը կարգազանցություն չի դրսևորել, ուստի Սուրեն Մկրտչյանը որոշել է պայքարել:
Նա նաև շեշտեց, որ չնայած նախագահի հանձնարարական կա, հանձնաժողով էլ ստեղված է, բայց տուգանքների իրավաչափության հարցը այդպես էլ չի լուծվում՝ շարունակում են թեթևակի խախտումների պատճառով մտնել մարդկանց գրպանը՝ կրկնապատկելով տուգանքների թիվը, գործերը հասցնելով մինչև ԴԱՀԿ:
