Երեք տնային աշխատողներ Կալիֆոռնիայից ցանկանում են դատական կարգով լուծել հարցերը սաուդցի արքայազն Մաջիդ Աբդուլազիզ Ալ-Սաուդի հետ սեռական ոտնձգությունների համար։ Այս մասին հայտնում է New York Daily News-ը։
Փաստաբանը երեք կանանց անունից հայց է ներկայացրել 29-ամյա արքայազնի դեմ։ Տան աշխատողները հաստատում են, որ արքայազնը որոշ ժամանակ իրենց պատանդ է պահել իր առանձնատանը, ստիպել մերկ քայլել և ոտնձգություն է կատարել նրանց նկատմամբ։
«Դու ինձ դուր ես գալիս։ Վաղը ես երեկույթ եմ ունենալու, որի ժամանակ դու կանես այն, ինչ ես եմ ուզում, կամ ես քեզ կսպանեմ»,- ասել է արքայազնը զոհերից մեկին։
Երկրորդ զոհը խոստովանել է, որ Մաջիդ Աբդուլազիզ Ալ-Սաուդը ոտնձգություն է կատարել իր նկատմամբ, իսկ դադարեցնելու խնդրանքին արձագանքել է ագրեսիայով։
Կանայք պնդում են, որ արքայազնը մշտապես հարբած է եղել, ագրեսիվ, մշտապես բղավել է։
Ներկայումս արքայազնի դեմ առաջադրված են սեռական ոտնձգությունների, միտումնավոր բարոյական վնաս հասցնելու և ազատությունից ապօրինաբար զրկելու մեղադրանքներ։
Հաղորդվում է, որ սեպտեմբերին արքայազնն արդեն ձերբակալվել է սեռական ոտնձգության փորձի համար, սակայն ավելի ուշ նրան ազատ են արձակել գրավի դիմաց։
