«Սիրիայի բարեկամներ» խմբի անդամ պետությունների հերթական հանդիպմանը, որը կայանալու է Թուրքիայի Ստամբուլ քաղաքում՝ ապրիլի 20-ին, կքննարկվեն Սիրիայի ապագան և այն միջոցները, որոնք անհրաժեշտ է ընդունել երկրում իրավիճակը կայունացնելու համար: Ինչպես հաղորդում է Anadolu գործակալությունը, այս մասին հայտարարել է Թուրքիայի արտգործնախարար Ահմեդ Դավութօղլուն:
Դավութօղլուն նշել է, որ հանդիպմանը մասնակցելու է նաև ԱՄՆ պետքարտուղար Ջոն Քերին:
«Ես հեռախոսազրույց եմ ունեցել ամերիկացի իմ գործընկերոջ՝ Ջոն Քերիի հետ, և նրա հետ քննարկել ենք «Սիրիայի բարեկամներ»-ի հանդիպման մանրամասները»,- ասել է արտգործնախարարը:
Ակնկալվում է, որ «Սիրիայի բարեկամներ» խմբի հանդիպմանը կմասնակցեն 11 երկրների ներկայացուցիչներ՝ ԱՄՆ, Մեծ Բրիտանիա, Ֆրանսիա, Իտալիա, Թուրքիա, Եգիպտոս, ԱՄԷ, Կատար, Հորդանան, Սաուդյան Արաբիա:
