Մի շարք տոնավաճառներում աշխատող ձեռներեցները ահազանգում են՝ հայտնվել են կրկին խաբվածների կարգավիճակում. էլեկտրաէներգիայի սակագինը փոքր և միջին բիզնեսի համար չի սուբսիդավորվում: Ձեռներեցները հիշեցնում են՝ չնայած վարչապետ Հովիկ Աբրահամյանը հայտարարել էր, որ էլեկտրաէներգիայի սակագնի բարձրացումը դեռ մեկ տարի չի անդրադառնա բնակչության 79 տոկոսի և ամսական մինչև 500 կիլովատտ էլեկտրաէներգիա օգտագործող փոքր բիզնեսի վրա, պատկերը բոլորովին այլ է. սեպտեմբեր ամսվա համար վճարել են 49 դրամով:
Շուկաներում փոքր տաղավար ունեցող ձեռներեցների պնդմամբ՝ էլեկտրաէներգիայի համար վճարում են շուկայի սեփականատիրոջը, քանի որ խոշոր էլեկտրաէներգիայի սպառողը համարվում է շուկան, բայց այստեղ էլ կամայականություն է դրսևորվում. կան տաղավարներ, որտեղ ընդհանրապես հաշվիչներ տեղադրված չեն:
Տոնավաճառներում աշխատող ձեռներեցները նշում են, որ գուցե իրենց տեղերը կորցնելու վտանգի առաջ կանգնեն, բայց այլ ելք այլևս չունեն. եթե կառավարությունը խնդիրը չկարգավորի, ձմռանը տաղավարները ջեռուցել չեն կարողանա, ուստի՝ աշխատել ևս:
