Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսը Մայր Աթոռ Սուրբ Էջմիածնում հոկտեմբերի 24-ին ընդունել է Ֆրանսիայի Բուժ դյու Րոն նահանգի սենատոր Ժան Նոել Գերինիին: Ինչպես տեղեկացրին Մայր Աթոռի տեղեկատվական համակարգից, ողջունելով սենատորին` Ամենայն Հայոց կաթողիկոսն անդրադարձել է Բուշ դյու Րոն նահանգի և Մայր Աթոռի Ս. Էջմիածնի միջև մեկ տասնամյակից ավելի պատմություն ունեցող բարեկամական ջերմ հարաբերություններին:
Այս կապակցությամբ Նորին Սրբությունը գոհունակությամբ նշել է, որ 2003թ. Ժան Նոել Գերինիի հովանավորությամբ Մայր Աթոռում հիմնադրված և Մարսելի «Բարձունք 5165» բարեգործական կազմակերպության ջանքերով գործող ատամնաբուժարանը շարունակում է իր օգտակար ծառայությունը բերել Էջմիածին քաղաքի և շրջակայքի բնակչությանը: Վեհափառ Հայրապետը նաև իր գնահատանքն է հայտնել տիար Ժան Նոել Գերինիին` հայ մանուկների առողջության վերականգնմանն ուղղված նրա ազնիվ ջանքերի համար:
Անդրադառնալով ապագա փոխհամագործակցությանը, ինչպես նաև Հայաստանում իրագործվելիք սոցիալական ծրագրերին` սենատորը, իր հերթին, հաստատել է, որ շարունակելու է անել ամենը, որպեսզի հայ մանուկները երբեք չհիվանդանան և ապրեն առավել առողջ ու անվտանգ:
Հանդիպման ավարտին Ամենայն Հայոց Կաթողիկոսն Աստծու օրհնությունն ու զորակցությունն է հայցել, որպեսզի տիար Գերինիի բոլոր նվիրական իղձերն ու բարի ցանկությունները կյանքի կոչվեն:
Հանդիպմանը ներկա է եղել Մայր Աթոռ Սուրբ Էջմիածնի Միջեկեղեցական հարաբերությունների բաժնի տնօրեն Հոգեշնորհ Տ. Շահե վարդապետ Անանյանը:
