Այսօր ԱՄՆ Մեյն նահանգի Ներկայացուցիչների պալատը ընդունել է Արցախի Հանրապետության անկախությունը ճանաչող բանաձև: Նշենք, որ մինչ այս Արցախի ճանաչումը հռչակող բանաձևեր են ընդունվել նաև Մասաչուսեթս ու Ռոուդ Այլենդ նահանգների կոնգրեսները:
Բանաձևում մասնավորապես ասվում է, որ Լեռնային Ղարաբաղը Հարավային Կովկասում գտնվող շրջափակված մի շրջան է, որը պատմականորեն եղել է Հայաստանի մաս՝ հիմնականում ունենալով հայկական բնակչության մեծամասնություն, և որը Հայաստանից անջատվել է սովետական բռնապետ Իոսիֆ Ստալինի կողմից՝ միացվելով նորաստեղծ Սովետական Ադրբեջանի իշխանությանը:
1988 թ-ի փետրվարի 20-ը Լեռնային Ղարաբաղում նշանավորվել է ազգային ազատագրական շարժման մեկնարկով: Լեռնային Ղարաբաղի ժողովրդավարական շարժումը օրինակ դարձավ ողջ Սովետական Միության ժողովուրդների համար ընդդիմանալու բռնապետությանը ու տեր կանգնելու իրենց իրավունքներին ու ազատություններին՝ աջակցելով ժողովրդավարության տարածմանը միլիոնավոր մարդկանց համար ու աջակցելով խաղաղությանը ողջ աշխարհում:
1989 թ-ին Միացյալ Նահանգների Սենատը իր աջակցությունը հայտնեց Լեռնային Ղարաբաղի ժողովրդի անկախության համար պայքարում: 1991 թ-ի սեպտեմբերի 2-ին համընդհանուր ժողովրդավարության արտահայտման միջոցով հռչակվեց Լեռնային Ղարաբաղի Հանրապետությունը՝ համաձայն այն օրերին գործող օրենսդրության ու միջազգային նորմերին:
1991 թ-ի դեկտեմբերի 10-ին Լեռնային Ղարաբաղի ժողովուրդը համընդհանուր հանրաքվեի արդյունքում քվեարկեց շրջանի անկախացման համար, իսկ 1992 թ-ի հունվարի 6-ին Լեռնային Ղարաբաղի Հանրապետության իրավականորեն ընտրված իշխանությունը հռչակեց անկախություն:
Ադրբեջանը սկսեց լայնածավալ զինվորական գործողություններ՝ ճնշելու անկախության շարժումը Լեռնային Ղարաբաղի Հանրապետությունում, որը ավարտվեց 1994 թ-ին ստորագրված հրադադարով:
Ռուսաստանի ու Ֆրանսիայի հետ մեկտեղ լինելով միջնորդ Հարավային Կովկասում խաղաղության հաստատման գործում՝ ԱՄՆ-ը անմիջականորեն աջակցեց Լեռնային Ղարաբաղին՝ մարդասիրական օգնություն մատակարարելով հետպատերազմական վերականգման համար:
Լեռնային Ղարաբաղի Հանրապետությունը ստեղծեց ժողովրդավար պետություն՝ ազատ շուկայական տնտեսությունով, որը դիտարկվում է միջազգային դիտորդների կողմից որպես ազատ ու արդար:
Հետայսու բանաձևը հռչակողները իրենց աջակցությունն են հայտնում Լեռնային Ղարաբաղի Հանրապետությանը՝ զարգանալու որպես ազատ ու անկախ պետություն՝ ապահովելով իր բնակչության իրավունքները ապրելու ազատ ու անկախ հասարակության մեջ:
Բանաձը կոչ է անում ԱՄՆ նախագահին ու Կոնգրեսին աջակցել Լեռնային Ղարաբաղի Հանրապետության ինքնորոշմանը ու ժողովրդավարական անկախությունը, ինչպես նաև ապահովելի նրա ներգրավվածությունը միջազգային հանրության կողմից գործադրվող ջանքերին՝ հասնելու արդար ու հարատև խաղաղության տվյալ ռազմավարական նշանակություն ունեցող տարածաշրջանում:
Սույն բանաձևի պատճեները փոխանցվում են Պետքարտուղարին, ԱՄՆ նախագահ Բարաք Օբամային, ԱՄՆ Ներկայացուցիչների պալատի խոսնակին, ԱՄՆ-ում Լեռնային Ղարաբաղի Հանրապետության մշտական ներկայացուցիչ Ռոբերտ Ավետիսյանին, Մեյն նահանգի Ներկայացուցիչների Պալատի յուրաքանչյուր անդամի:
emedia.am