Իրաքը շահագրգռված է Ռուսաստանի հետ ամուր հարաբերությունների հաստատմամբ՝ երկուշաբթի Բաղդադում Ռուսաստանի դեսպան Իլյա Մորգունովի հետ հանդիպմանը հայտարարել է Իրաքի վարչապետ Հայդեր Ալ-Աբադին՝ փոխանցում է RIA Novosti-ն։
«Ռուսաստանի հետ ավելի ամուր հարաբերությունների հաստատումը բխում է երկու ժողովուրդների շահերից»,- նշել է վարչապետը։
Ռուս դեսպանը Իրաքի վարչապետին է փոխանցել Ռուսաստանի նախագահ Վլադիմիր Պուտինի ուղերձը, որում, վարչապետի գրասենյակի հաղորդմամբ՝ ասվում է տարբեր ոլորտներում, մասնավորապես՝ սպառազինության ոլորտում Իրաքի հետ երկկողմ հարաբերությունների զարգացման և ԴԱԻՇ-ին դիմակայելու համար տեղեկատվության փոխանակման Ռուսաստանի ցանկության մասին։
Այդ առնչությամբ Ալ-Աբադին ասել էր, որ Իրաքը դաժան պատերազմ է վարում ԴԱԻՇ-ի դեմ և ողջ միջազգային հանրության ջանքերի կարիքն ունի՝ դրան վերջ տալու համար։ Իրաքը համակարգման աշխատանքներ է իրականացնում Ռուսաստանի հետ՝ ահաբեկչությանը հակազդելու համար։
Ռուսաստանը, Իրանը, Իրաքն ու Սիրիան սեպտեմբերի վերջին Բաղդադում ստեղծել էին ընդհանուր տեղեկատվական կենտրոն՝ համակարգելու պայքարը ԴԱԻՇ-ի դեմ։