Մարտին Հայաստան տրանսֆերտների աճի զուսպ տեմպի կանխատեսումները թույլ չեն տալիս շուկայի մասնակիցներին «թուլանալ»: Ամերիկյան դոլարի գրավչությունը մեր երկրում ավելացնում են նաև միջազգային արժութային FOREX շուկայում այդ ակտիվի ուժեղ դիրքերը:
Ինչպես «Առաջին լրատվական»-ին հայտնեց FOREX Club-ի վերլուծաբան Միքայել Վերդյանը, այս շաբաթ ԱՄՆ դոլարը կարող է կոնսոլիդացնել կամ մի փոքր նվազեցնել դիրքերը, քանի որ շուկայի որոշ մասնակիցներ կշարունակեն ֆիքսել իրենց դիրքերը՝ պայմանավորված նրանով, որ ամերիկյան արժույթը չի կարողանում հաղթահարել 420 դրամ հոգեբանական շեմը: Դրան կարող է նպաստել նաև ՀՀ Կենտրոնական բանկը՝ արժութային շուկայում ներարկումների (ինտերվենցիաներ) միջոցով:
Սակայն, հաշվի առնելով միջազգային շուկայում իր մրցակիցների համեմատ դոլարի դրական դինամիկան, կարելի է ենթադրել, որ դոլարի կորուստները մեծ չեն լինի:
Միաժամանակ դոլարի աճին կնպաստի նաև բնակչության և բիզնեսի կողմից դրա պահանջարկի ավելացումը: ԿԲ հաղորդագրության համաձայն՝ անցած շաբաթ ներբանկային շուկայում առևտրային բանկերի կողմից դոլարի առուվաճառքը կազմել է 19,077 մլն դոլար:
«Մեր գնահատականներով՝ Հայաստանում կանխիկ դոլարի միջին փոխարժեքն այս շաբաթ, ամենայն հավանականությամբ, կգտնվի 418-421 դոլարի միջակայքում»,- ասաց Մ. Վերդյանը:
