Ամերիկացիններին հավաքագրելու ԴԱԻՇ ահաբեկչական խմբավորման փորձերը սպառնալիք են, որն ակտուալ է «օրը 24 ժամ»։ Նման կարծիք է հայտնել ԱՄՆ Հետաքննությունների դաշնային բյուրոյի տնօրեն Ջեյմս Կոմին, ով այցելել է Ցինցինատի (Օհայո) քաղաքում FBI-ի ստորաբաժանումներից մեկը։ Այս մասին հայտնում էTASS գործակալությունը։
Բյուրոն ձեռնարկում է միջոցառումներ՝ ի հայտ բերելու և օպերատիվ կերպով կանգնեցնելու նրանց, ովքեր ենթարկվել են ահաբեկիչների ազդեցությանը։ Նման գործերով հետաքննություններ են տարվում բոլոր 50 նահանգներում։
Ինչպես անցած շաբաթ Կոնգրեսում լսումներին հայտնել էր ԱՄՆ Ազգային հակաահաբեկչական կենտրոնի ղեկավար Նիկ Ռասմուսենը, ամերիկյան հատուկ ծառայությունների տվյալներով՝ ավելի քան 28 հազար անձ տարբեր երկրներից ուղևորվել են Իրաք և Սիրիա՝ ԴԱԻՇ-ի ռազմական գործողությունների գոտի։ Նրանցից 5000-ը արևմտյան երկրներից են, ներառյալ մոտ 250-ը՝ ԱՄՆ-ից։
