էներգետիկայի և բնական պաշարների նախարարությունն այսօր տեղեկացրել է, որ «Հայաստանի էլեկտրական ցանցեր» ընկերության՝ «Տաշիր գրուպին» վաճառքից հետո նոր պարտավորություններ են ավելացել։ Սեփականատիրոջ պարտավորությունների մեջ է մտնում առնվազն 2 տոկոսով նվազեցնել ընկերության տեխնոլոգիական կորուստները։ Մյուս կողմից՝ վերջինս պարտավոր է թույլ չտալ առևտրային կորուստների ավելացում՝ 2014-2015թթ. սակագնային տարվա համեմատ, նաև՝ 100 տոկոս վճարումներ կատարել՝ արտադրողներին և ծառայություն մատուցողներին:
Տնտեսագետ Աշոտ Եղիազարյանը մեզ հետ զրույցում տեսակետ հայտնեց, որ ՀԷՑ-ի նոր պարտավորություններից սպառողը չի շահելու։ «Ըստ էության, ՀԷՑ-ը ստանձնել է այն պարտավորությունները, որոնք որ կային նախորդ սեփականատիրոջ օրոք, և ինչը որ չկարողացավ անել նախորդ սեփականատերը»,- ասաց տնտեսագետը։ Վերջինս նաև հակված չէ հավատալու, որ վարչապետն է համոզել Սամվել Կարապետյանին գնել ՀԷՑ-ը։ «Եթե այդ պրոբլեմները չկարողացավ լուծել Ինտեր ՌԱՕ-ն, առավել ևս Սամվել Կարապետյանը չի կարողանալու լուծել ՀԷՑ-ի խնդիրները, որոնք համակարգային են։ ՀԷՑ-ը ճգնաժամային իրավիճակից հանելը անիրագործելի է ստեղծված իրավիճակում։ Հաշվի առնելով նաև, որ ՀԷՑ-ը առանձին օղակ չէ, էներգետիկ օղակներից մեկն է, սպասարկող օղակ է, և եթե ճգնաժամը չլուծվի ընդհանուր էներգետիկ համակարգում, ՀԷՑ-ում նույնպես չի լուծվելու»,- ասաց Եղիազարյանը՝ հավելելով, որ ՀԷՑ- վաճառքի գործարքից, ըստ էության, «սպառողը չի շահում, մեր տնտեսության վրա սակագնային ծանր բեռը մնում է»։
Դիտե՛ք մեր հարցազրույցը տնտեսագետ Աշոտ Եղրազարյանի հետ։
