Այսօր մեկնարկեց Երևանի ավագանու ընտրությունների պաշտոնական քարոզարշավը:
ՕԵԿ նախագահ Արթուր Բաղդասարյանի խոսքով՝ իրենք նախընտրական քարոզարշավը սկսել են լավ տրամադրությամբ և կավարտեն հաղթանակով. «Մենք առաջադրել ենք երևանցի թեկնածուի, ինչը շատ կարևոր է, քանի որ նա պետք է ծանոթ լինի գրված և չգրված օրենքներին…»:
Երևանի ավագանու ընտրություններին Արմեն Երիցյանին ուժ կտան կանայք՝ պատահական չէ, որ նախընտրական քարոզարշավը սկսվեց ապրիլի 7-ին: Այս մասին այսօր՝ ապրիլի 7-ին, ՕԵԿ նախընտրական քարոզարշավի բացմանը ասաց ԱԱԽՔ քարտուղար Արթուր Բաղդասարյանը: Նրա խոսքով՝ իրենք ընտրել են մրցունակ թիմ և կարող են արձանագրել հաջողություններ:
Նա նշեց, որ «բազմաթիվ լուսավոր ծրագրեր են ներկայացնում»: ՕԵԿ-ի նախընտրական ծրագրի հիմնադրույթներն են` Երևան քաղաքի կառավարման սկզբունքներն ու կազմակերպումը, աշխատատեղերի ստեղծումը, զբաղվածության ենթակառուցվածքների հիմնումը, սոցիալական ոլորտի գործառույթների արդիականացումը, կոմունալ բնակարանային տնտեսության բարեփոխումը, կապի հեռահաղորդակցության և տրանսպորտի զարգացումը, Երևանի կառուցապատումը, բարեկարգումը և բնապահպանական խնդիրները:
Համաձայն ՕԵԿ-ի ծրագրի՝ մշակույթը պետք է դարձնել Երևանի այցեքարտը: Դրանում տեղ են գտել նաև երիտասարդական քաղաքականությունը, կրթության բարձր որակի ապահովումը, արտաքին կապերի ընդլայնումն ու Սփյուռքի հետ համագործակցության ամրապնդումը:
Իր հերթին Երևանի ավագանու ընտրություններին քաղաքապետի ՕԵԿ-ական թեկնածու Արմեն Երիցյանը ասաց. «ՕԵԿ-ի կողմից պայքարը պետք է լինի ազնիվ և շիտակ, և ամեն ինչ պետք է արվի՝ հաղթելու համար»:
Ա. Երիցյանը շնորհավորեց կանանց մեկամսյակը՝ նշելով. «Ճիշտ է, ես ասել եմ, որ դուք խլել եք մեր փետրվարի 23-ը՝ դարձնելով մեկամսյակ, բայց դա այլ խնդիր է: Ես ցանկանում եմ, որ միշտ ժպիտ լինի ձեր դեմքին և լավ լինեք, իսկ քաղաքականության մեջ ունենաք ձեր դերն ու խոսքը»:
«Մենք պետք է ամեն ինչ անենք, որ Երևանը այնպիսին լինի, որ բոլորս տեսնենք և հպարտությամբ ասենք՝ սա մեր տունն է»,- ասաց Արմեն Երիցյանը:
Նրա խոսքով՝ իրենք չեն ասում, որ Երևանում ոչինչ չի արվում, այլ ասում են, որ իրենք կարող են ավելին անել ու անելու են: «Յուրաքանչյուր թաղ պետք է զգա դա»,- ավելացրեց Արմեն Երիցյանը:
