ՀՊՏՀ միջազգային տնտեսական հարաբերությունների ֆակուլտետի դեկան Ատոմ Մարգարյանը «Առաջին լրատվական»-ին ներկայացրեց իր դիտարկումները 2016թ. բյուջեի նախագծի վերաբերյալ. «Բյուջեի նախագիծը բավականին զուսպ է թե՛ եկամտային մասով, թե՛ ծախսային մասով: Վերջին տարների բյուջեի դինամիկային նայելով, հատկապես եկամտային մասով, այդքան մեծ տեղաշարժեր կամ աճ չենք տեսնում, ընդհակառակը՝ նախորդ տարվա համեմատ 8,5 միլիարդով հարկային եկամուտների ավելի ցածր գանձումներ են նախատեսված: Սա պայմանավորված է թե՛ ներքին տնտեսական, թե՛ արտաքին ազդակներով պայմանավորված ռիսկերով: Ընթացիկ տարվա բյուջեն նախորդի համեմատ 84,5 միլիարդ եկամուտների հավելաճ էր նախատեսում, իսկ այս նախագիծը 10 անգամ ավելի պակաս եկամուտների հավելաճ է նախատեսում: Մյուս տարվա բյուջեում ծախսերը ավելանում են, իսկ դա օբյեկտիվ հիմքեր ունի: Որոշ չափով ավելանալու է դեֆիցիտը: Այս նախագիծը ես կանվանեի իրատեսական բյուջեի նախագիծ:
ԲՀԿ խմբակցության պատգամավոր, տնտեսագետ Միքայել Մելքումյանը ևս հայտնեց իր կարծիքը. «Չի կարելի համարել տնտեսական զարգացման բյուջե, որովհետև 2, 2 տոկոս տնտեսական աճն այնքան ցածր է, որ մենք հետ ենք գնացել, մեկ էլ 2010թ. ենք ունեցել այդպիսի ցուցանիշ: Ես կարծում եմ, որ 50 տոկոսն է արտաքին ռիսկերով պայմանավորված, մյուս մասը ներքին կառավարման արդյունավետությամբ է պայմանավորված: Վիճակագրական տնտեսական աճը չի նշանակում տնտեսական զարգացում, իսկ մենք այդ ռեսուրսներն ունենք: Հայաստանում արմատապես պետք է փոխվի տնտեսական քաղաքականության բովանդակությունը, և Հայաստանը պետք է դառնա ներդրումների համար նպաստավոր երկիր, իսկ դրա համար երաշխիքներ են պետք»:
