Թուրքական Zaman թերթի փոխանցմամբ, Թուրքիան ու Ուկրաինան պատրաստվում են վերացնել անցագրային ռեժիմը: Այս մասին հայտարարել է Ուկրաինայի արտգործնախարարությունը: Այդ կապակցությամբ Ուկրաինայի մայրաքաղաք Կիևում է գտնվում թուրքական պատվիրակությունը:
Նշվում է, որ երկու երկրների միջև անցագրային ռեժիմի վերացման հիմքը դրվեց այս տարվա հունվարին, երբ Թուրքիայի վարչապետ Էրդողանն այցելեց Ուկրաինա:
Դրանից հետո Ուկրաինայի նախագահ Վիկտոր Յանուկովիչը երկրի ԱԳՆ-ին, ՆԳՆ-ին ու Տրանսպորտի նախարարությանը կարգադրեց նախապատրաստվել Թուրքիայի հետ անցագրային ռեժիմի վերացմանը:
Հիշեցնենք, որ հունվարին կայացած իր ուկրաինական այցից երկու ժամ առաջ Էրդողանն ուկրաինական կողմից պահանջել էր այցի մակարդակը պետականից իջեցնել աշխատանքայինի, որպեսզի դրանով իսկ հնարավորություն ունենա չայցելելու Հոլոդոմորի («Սովասպանդի») զոհերի հուշարձան:
Հարցը կարգավորվել էր միայն վերջին պահին, երբ ուկրաինական կողմն Էրդողանին համոզել էր, որ իրենք այժմ այլ իմաստ են դնում Հոլոդոմորի հասկացության մեջ (այն չեն դիտարկում որպես ցեղասպանություն):