Բրիտանական իշխանությունները հավասարեցրել են փանքերի, գոթերի, ինչպես նաև ազգային ու կրոնական փոքրամասնությունների ներկայացուցիչների իրավունքները: Այսուհետև նրանց վրա հարձակումները կգնահատվեն որպես ռասային և կրոնական անհանդուրժողականության դրսևորում և կպատժվեն: Այս մասին հայտնում է The Guardian-ը:
Համապատասխան օրենքն ընդունվել է Մեծ Մանչեսթեր կոմսությունում: Այսուհետև բոլոր գործերը, որոնք կապված են վերը նշված անձանց դեմ ագրեսիայի դրսևորման հետ, Մանչեսթերի ոստիկանությունը կվերցնի հատուկ հսկողության ներքո: Բրիտանական հասարակությունը այդ հարցի վրա կենտրոնացել էր 2007 թվականին՝ 15-ամյա Սոֆյա Լանկաստերի սպանությունից հետո, որը մեծ արձագանք ստացավ:
Լանկաշիր կոմսության բնակչուհին այգում զբոսնելիս է եղել իր 16-ամյա ընկերոջ հետ: Այնտեղ նրանց վրա հարձակվել են 5 երիտասարդներ և դաժան ծեծի ենթարկել: Երկու շաբաթ անց աղջիկը մահացել է հիվանդանոցում: Իշխանությունները եկել են այն եզրակացության, որ զույգը հարձակման է ենթարկվել միայն այն պատճառով, որ Սոֆյան և իր ընկերը հագնված են եղել որպես գոթեր:
Զոհված աղջկա հարազատները բարեգործական հիմնադրամ էին բացել և սկսել զբաղվել ենթամշակույթների ներկայացուցիչների դեմ հարձակումները որպես ատելության հողի վրա հանցագործություն ճանաչելու մասին օրենքի լոբբինգով: Սոֆյային սպանողները դատապարտվել են ցմահ, իսկ հանցակիցները՝ 4-5 տարվա ազատազրկման:
