Կայացել է Հայաստանի ֆուտբոլի ֆեդերացիայի կարգապահական կոմիտեի հերթական նիստը, որից հետո ուշադրության կենտրոնում է հայտնվել Հայաստանի բարձրագույն խմբի առաջնության ընթացիկ մրցաշրջանի առաջատար «Ալաշկերտ»-ը։
Թիմի ֆուտբոլիստներ Սեկու Մամադու Ֆոֆանայի և Վահագն Մինասյանի՝ «Գանձասար-Կապանի»-ի հետ խաղում կարմիր քարտերի համար սահմանվել է 25․000-ական դրամ տուգանք։ Ֆուտբոլիստները որակազրկվել են 1-ական խաղով։
«Ալաշկերտ»-ի գլխավոր մարզիչ Աբրահամ Խաշմանյանի հեռացման համար ակումբը տուգանվել է 250․000 դրամով, մասնագետը որակազրկվել է 10 խաղով։ Կարգապահական կոմիտեի որոշման մեջ Խաշմանյանի պահվածքը «ոչ սպորտային» է որակվել։
Նույն խաղում «Գանձասար-Կապան»-ի խորհրդատու մարզիչ Սամվել Պետրոսյանի, ֆուտբոլիստ Ալեքսանդր Պետրոսյանի հեռացումների համար ակումբը տուգանվել է 100․000-ական դրամով։
Հանդիսատեսների անվայել պահվածքի համար «Գանձասար-Կապան»-ի մարզադաշտը որակազրկվել է 1 խաղով, ակումբը տուգանվել է 150․000 դրամով։ Այսպիսով՝ «Գանձասար-Կապան»-ի նկատմամբ ընդհանուր 350․000 դրամ տուգանք է սահմանվել։
