ԱՄՆ պետքարտուղար Ջոն Քերին՝ կապված դաշնային բյուջեի սեկվեստրի հետ, որոշել է տարեկան աշխատավարձի 5 տոկոսը նվիրաբերել բարեգործությանը: Միջոցները կնվիրաբերվեն այն կազմակերպությանը, որը զբաղվում է ԱՄՆ արտաքին գերատեսչության աշխատակիցներին օգնություն ցուցաբերելով: Այս մասին հայտնում է ITAR-TASS-ը՝ հղում անելով ԱՄՆ Պետդեպի մամլո խոսնակ Վիկտորյա Նուլանդին:
Նա հստակեցրել է, որ նման կազմակերպությունները օգնում են ծառայողական պարտականություների կատարման ժամանակ զոհվածների հարազատներին, կարիքավոր երեխաներին:
Նուլանդի խոսքով՝ դեռևս որոշված չէ, թե որ կազմակերպությունը կստանա գումարը: Նուլանդը նշել է, որ ներկայում ամերիկյան դիվանագիտության ղեկավարը տարեկան 183 հազար 500 դոլար է ստանում: Այդ գումարի 5 տոկոսը կազմում է 9,175 հազար դոլար:
Հիշեցնենք, որ մեկ օր առաջ էլ իր տարեկան աշխատավարձի 5 տոկոսի նվիրաբերման նախաձեռնությամբ հանդես էր եկել ԱՄՆ նախագահ Բարաք Օբաման, որի տարեկան աշխատավարձը կազմում է 400 հազար դոլար:
Իրենց աշխատավարձերից նվիրաբերում կատարելու մտադրություն են հայտնել նաև Պենտագոնի ղեկավար Չակ Հեյգելն ու նրա առաջին տեղակալ Էշթոն Քարթերը:
Հիշեցնենք, որ Քերին մեծ ունեցվածք ունի, որի չափը 2011 թվականին գնահատվել է 184-287 մլն դոլար:
