Առնվազն 3 000 մարդ մնացել է առանց պատշաճ բուժօգնության աֆղանական Կունդուզում «Բժիշկներ առանց սահմանների» միջազգային կազմակերպության հիվանդանոցի գնդակոծությունից հետո: RIA Novosti-ի հաղորդմամբ՝ այս մասին Ժնևում ճեպազրույցի ժամանակ հայտարարել է ՄԱԿ-ի Հումանիտար հարցերի կոորդինացիայի վարչության մամլո քարտուղար Յենս Լերկեն:
Վերջերս իրավիճակն Աֆղանստանում սրվել է: Կունդուզում «Բժիշկներ առանց սահմանների» հիվանդանոցը, որտեղ եղել է մոտ 200 մարդ, մասամբ քանդվել է շաբաթ առավոտյան ռմբակոծության հետևանքով, 22 մարդ է զոհվել: ԱՄՆ զինված ուժերի ներկայացուցիչը խոստովանել է, որ ամերիկյան ռազմաօդային ուժերն այդ ժամանակ օդային հարվածներ են հասցրել «հիվանդանոցի մերձակայքում»:
Լերկեն հավելել է, որ ներկայումս դժվարացել է Կունդուզում մարդկանց հումանիտար օգնություն հասցնելը:
Ընդհանուր հումանիտար իրավիճակի մասին Լերկեն ասել է, որ հումանիտար օգնության պաշարներն Աֆղանստանում բավարար են:
