Ցանկանալով ուշադրություն գրավել, որպեսզի հիվանդ հոր համար կարողանա միջոցներ հավաքել, հուսահատված չին դեռահասը Անհոյ նահանգից, հագնվում է կովի դերային հանդերձանք, դնում է կովի դիմակ և մարդկանց տեղափոխում իր մեջքի վրա 5 յուանով:
Ինչպես գրում է odditycentral.com-ը` դեռահաս Դունդունը այդ ամենն արել է արդեն երեք ամիս շարունակ, սակայն Հեֆեյ քաղաքի բնակիչները բողոքել են նրա դեմ՝ մեղադրելով դրամաշորթության ու խաբեբայության մեջ: Առկա մեղադրանքները փարատելու համար լրատվամիջոցները հրապարակել են 15-ամյա Հաո Դունդունի լուսանկարները հիվանդ հոր հետ՝ ապացուցելով, որ դեռահասը ճշմարտությունն է ասել:
«Հայրս պետք է վճարի ամսական 5000 յուան բժշկական գործողությունների համար»,- ասել է Հաոն լրագրողներին: -Եղբայրս ու քույրս պետք է դպրոց գնան: Ես անձնագիր չունեմ աշխատելու համար, այնպես որ՝ պետք է մուրացկանություն անեմ»:
Հաոյի հայրը` Հինլի Հաոն զբաղվել է ֆերմերությամբ, սակայն 2000թ. մեջքի վնասվածք է ստացել ու տեղափոխվել քաղաք, որտեղ փորձել է փոքրիկ խանութ բացել: Անցյալ տարի Հինլին ծեծի է ենթարկվել ու ընկել հիվանդանոց, քանի որ մեջքի ցավերը ուժգնացել են: Բժիշկները նրա մոտ ողնաշարի կոտրվածք ու վզի վնասվածք են ախտորոշել, որից հետո մարմինը կաթվածահար է: Հինլին որևէ փոխհատուցում չի ստացել, այնպես որ՝ ընտանիքն է ստիպված եղել հոգալ բոլոր ծախսերը:
Առկա խնդիրները լուծել չկարողանալով` Հինլիի կինը երեք ամիս առաջ լքել է ընտանիքը: Դրանից հետո էլ Դունդունը, որը ընտանիքի երեք զավակներից ամենամեծն է, թողել է դպրոցը` մուրալու համար:
Մի քանի ամիս առաջ նմանատիպ մեկ այլ պատմություն է եղել Չինաստանում, երբ հայրը ձիու դիմակ ու հանդերձանք է հագել և զբաղվել մուրացկանությամբ` լեյկեմիայով հիվանդ որդու բուժման համար գումար հավաքելու նպատակով:
