Zimperium ընկերության մասնագետները հայտնաբերել են Android օպերացիոն համակարգի նոր խոցելիություն, որը սպառնում է 1 միլիարդ սարքերի, հայտնում է The Guardian-ը:
Հուլիսին Zimperium ընկերությունում բացահայտել են Stagefright-ի խոցելիությունը, ինչը թույլ է տալիս չարամիտներին ջարդել այդ օպերացիոն համակարգով աշխատող սարքերը և մուտք ունենալ հիշողության մեջ պահպանվող տվյալներին: Այն ժամանակ այդ խնդիրը կարողացան լուծել օպերատիվ նորացումների միջոցով:
Վերջերս, սակայն, փորձագետները գտել են Stagefright 2.0 խոցելիության նոր տարբերակ: Այժմ չարամիտները հնարավորություն ունեն վարակված ֆայլ տեղադրել օգտվողի ներբեռնվող ձայնագրություններում կամ տեսագրություններում, ինչպես նաև վարակել սմարթֆոնը նույնիսկ ներբեռնվող ֆայլերի նախնական դիտման ժամանակ: Սարքը վարակելուց հետո նրանք կարող են ձայնագրել խոսակցությունները, կարդալ հաղորդագրությունները և այլն:
Google-ն արդեն տեղեկացվել է խնդրի վերաբերյալ և հայտարարել է նորացման շուտափույթ թողարկման մասին, ինչը կվերացնի խոցելիությունը:
