Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում դատավոր Մխիթար Պապոյանի նախագահությամբ այսօր՝ ապրիլի 4-ին, շարունակվեց կենսաթոշակային հիմնադրամի նախկին նախագահ Վազգեն Խաչիկյանի և 12 աշխատակիցների նկատմամբ հարուցված քրեական գործով դատավարությունը:
Այսօրվա դատական նիստում միջնորդություն է ներկայացրել ամբաստանյալ Աշոտ Աբրահամյանը: Նա նշեց, որ իրեն անհրաժեշտ է անցնել բուժհետազոտություն և խնդրել դատարանին թույլատրել բուժումը: Դատավոր Մխիթար Պապոյանը մերժել է միջնորդությունը՝ նշելով, որ դատարանը չունի նման իրավասություն: Ստացիոնար բուժում անհրաժեշտության դեպքում ապահովում է ՔԿՀ-ն:
Մեղադրող կողմը դատարանում հրապարակում է Վազգեն Խաչիկյանի մեղադրանքը: Ըստ մեղադրանքի` Խաչիկյանը տեղյակ է եղել կենսաթոշակների յուրացումից, կազմակերպել է այդ գործընթացը, ինչի համար ըստ էության, չարաշահել է պաշտոնեական դիրքը: Խաչիկյանի մեղադրանքը չի ընդունում, դատավորը խնդրել է մեղադրող կողմին դատաքննության հաջորդ փուլում հստակեցնել մեղադրանքի այդ մասը: Վազգեն Խաչիկյանը իրեն առաջադրված երեք հոդվածներից և ոչ մեկում մեղավոր չի ճանաչում: Վերջինս դիմելով դատարանին նշեց. «Ոչ հարգելի բարձր դատարան, ես չեմ ընդունում մեղադրանքները»:
Հիշեցնենք, որ Վազգեն Խաչիկյանին մեղադրանք է առաջադրվել այն բանի համար, որ նա, 2005թ. հունվարի 14-ից մինչև 2010թ. դեկտեմբերի 17– ն աշխատելով ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի պաշտոնում, հանդիսանալով մշտապես կազմակերպչական-տնօրինչական և վարչատնտեսական գործառույթներ իրականացնող պաշտոնատար անձ և օգտվելով ծառայությունը կառավարելու իր լիազորություններից, մասնավորապես՝ այն, որ իր կողմից վերահսկվել է կենսաթոշակառուների կողմից կասեցված կենսաթոշակի վճարումը վերսկսելու վերաբերյալ կենսաթոշակային ապահովության և առանձին ծրագրերի վարչությանը ներկայացված դիմումների հիման վրա կուտակված կենսաթոշակների գումարները Ծառայության վճարային ծառայության Երևան քաղաքի ստորաբաժանումների կողմից վճարելու գործընթացը:
Ծառայության մի շարք պաշտոնատար և պատասխանատու անձանց հետ, կազմակերպված խմբով, 2006–2010թթ. ընկած ժամանակահատվածում, օգտագործելով իրենց պաշտոնեական դիրքը, պաշտոնեկան կեղծիք կատարելու, այն է՝ կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի, ընդհանուր՝ 260.956.681 ՀՀ դրամ գումարները բացի այդ` Վազգեն Խաչիկյանը խարդախությամբ հափշտակել է պետական բյուջե վերականգնման ենթակա, առանձնապես խոշոր չափերի` 29.000.000 ՀՀ դրամ գումարը:
Քրեական գործի նախաքննության օրինականության նկատմամբ հսկողություն իրականացնող ՀՀ գլխավոր դատախազության պետական շահերի պաշտպանության վարչության դատախազը նաև հայցադիմում է ներկայացրել դատարան` քրեական գործով մեղադրյալներ Վ.Խաչիկյանից, Ա.Աբրահամյանից, Հ.Գրիգորյանից, Վ.Խաչատրյանից, Ս.Էլբակյանից, Հ.Հովհաննիսյանից, Ս.Սարգսյանից, Ա.Սուքիասյանից, Հ.Մարտիրոսյանից, Վ.Գևորգյանից, Հ.Դանիելյանից, Բ.Մուրադյանից և Ա.Խաչատրյանից հօգուտ պետական բյուջեի ընդհանուր` 267.583.336 դրամ բռնագանձելու պահանջի մասին`չվերականգնված վնասի մասով:
