Արենիում այսօր բոլորը ժպտում էին: Բոլորն այսօր այնտեղ բարի ու ջերմ հայացքով հյուրերին էին դիմավորում ու առաջին հերթին անուշահամ գինի հյուրասիրում: Արենին գինովցած էր. ամենամյա գինու փառատոնն էր մեկնարկել:
Գյուղացիների տների առջև բացված սեղանների զարդը տարբեր տեսակի գինիներն էին: Գինի գումարած տնական լավաշ ու հորած պանիր, գաթա ու մաճառ… Կարելի էր այնտեղ հյուր գնալ:
-Համտես արեք, առանց կում անելու մի հեռացեք, ախր պետք ա հասկանաք, թե ուր եք եկել: Բայց շատ խմելն էլ լավ չի, մի բաժակից ավելի չենք տա՝ գինին շառ ա,- հյուրասեր գյուղացիների հրավերները նման էին միմյանց:
Արենին հյուրընկալել է ավելի քան 5000 հյուրերի, այդ թվում՝ արտասահմանցիների:
543 տնտեսություն ունեցող Արենին զբաղվում է հիմնականում խաղողագործությամբ և պտղագործությամբ: Ամեն տարի ստացվող մի քանի հարյուր տոննա խաղողը մթերում են մարզի գինու գործարանները:
– Գինին հայի ինքնության, հայի մշակույթի, հայի կենցաղի անբաժանելի մասն է կազմել դարեր շարունակ: Այստեղ ծնված հազվագյուտ վայրի խաղողի սորտերի համադրությունից հրաշքներ են ծնվում: Սա յուրահատուկ փառատոն է, որը շատերի սիրելի տոնն է դարձել,- ասում են տեղացիները:
Արենիից հյուրերը հեռանում են ոչ միայն գինովցած, այլև գինով լի տարաներով: Ասում են՝ հենց եղանակները ցրտեն, ըմպած մեկ բաժակ գինին նրանց կհիշեցնի Արենիի ջերմ արևը:
Բացման արարողություն, պրոֆեսիոնալ գինի արտադրողների ցուցահանդես-վաճառք, տնական գինի արտադրողների ցուցահանդես-վաճառք, մրցույթներ և այլ տեսարժան պահեր;
Մանրամասները՝ 1in.am-ի պատրաստած տեսանյութում:
