«Մենք հայտնվել ենք նոր իրավիճակում,- «Առաջին լրատվական»-ի հետ զրույցում ասաց նախկին վարչապետ, ԱԺ ՀՀԿ խմբակցության պատգամավոր Խոսրով Հարությունյանը և հավելեց,- նոր իրավիճակ է այն, որ ադրբեջանական կողմն սկսեց օգտագործել նոր տեսակի զինատեսակներ, ընդ որում՝ արդեն թիրախավորվում է ոչ այնքան անմիջապես շփման գիծը, որքան թիկունքը, թիրախավորվում է խաղաղ բնակչությունը, մենք ունենք զոհեր, և դա եղել է անկաշկանդ, այսինքն՝ միտումնավոր թիրախ է ընտրվել խաղաղ բնակչությունը»:
Խ. Հարությունյանը անհամաձայնություն հայտնեց այն մտքին, որ կարծեք թե իշխանությունների մոտ չկա վտանգի համարժեք ընկալում, տոնում ենք Էրեբունի-Երևանի տոնը՝ չնայած այն կարծիքներին, որ միգուցե արժեր այդ տոնի համար ծախսվող գումարները ուղարկել սահմանային գոտի. «Եթե սահմանի վրա լարված իրավիճակ է, մենք չենք կարող ամբողջ հանրապետությունը պահել պանիկայի մեջ: Ընդհանրապես հանրային կյանքը, այո, պետք է ընթանա իր բնականոն հունով: Պետք չէ ավելորդ լարվածություն ներշնչել մեր քաղաքացիներին: Դրա անհրաժեշտությունը չկա: Սահմանագոտում ևս պետք է բնակչությունը բնականոն հունով ապրի: Ե՛վ Հայաստանի բանակը, և՛ Ղարաբաղի պաշտպանական բանակը, զինված ուժերը, միանգամայն տիրապետում են իրավիճակին, և առաջին անգամ չէ, որ դա ապացուցվել է: Ուժերի հարաբերակցությունը այնպիսին չէ, որ վերածվի լայնամասշտաբ պատերազմական գործողությունների»:
Անդրադառնալով Սերժ Սարգսյանի՝ ՄԱԿ-ի ամբիոնից հնչած ելույթին, Խ. Հարությունյանը նշեց. «Ի լուր աշխարհի նախագահը հայտարարեց, որ մենք հավատարիմ ենք միջազգային իրավունքի նորմերին, մենք հավատարիմ ենք կոնֆլիկտի խաղաղ կարգավորման գործընթացին, մենք առ այսօր համբերատար արել ենք ամեն ինչ, որպեսզի չդառնանք կոնֆլիկտի խաղաղ բանակցային գործընթացը ձախողողը, մինչդեռ հակառակ կողմից նույն բանը չենք տեսել: Նախագահ Սարգսյանը շատ հստակ հասկացրեց, որ այլևս անցան ժամանակները, երբ որ կողմերին պետք է հավասարահեռ, սիմետրիկ հայտարարություններ անել, ժամանակն է իրերն իրենց անուններով անվանել: Եվ հիմա Հայաստանը անուղղակի ստանձնում է մի առաքելություն, որը կստիպի միջազգային հանրությանը իրերը կոչել իրենց անուններով»:
