«Առաջին լրատվական»-ի տեղեկություններով՝ Դուբայում հանգստացող ԲՀԿ առաջնորդ Գագիկ Ծառուկյանը և ԱԺ ՀՀԿ խմբակցության պատգամավոր Սամվել Ալեքսանյանը Fly Dubai ավիաընկերությանը պատկանող օդանավով վերադարձել են մարտի 31-ին:
Այսօր «Առաջին լրատվական»-ին հայտնի դարձավ, որ Fly Dubai ավիաընկերության մարտի 31-ի նույն չվերթի շուրջ 25-30 ուղևորներ չէին ստացել իրենց ուղեբեռը: Պարզվում է, որ օդանավում մոտ 25 ուղևորների ուղեբեռի համար նախատեսված տեղն ամբողջությամբ զբաղեցված է եղել Սամվել Ալեքսանյանին և Գագիկ Ծառուկյանին պատկանող ուղեբեռով: Իսկ այն քաղաքացիները, ովքեր մարտի 31-ին չէին ստացել իրենց ուղեբեռը, այն ստացել են միայն այսօր: Այսինքն՝ Fly Dubai ավիաընկերությունը առանց որևէ հիմնավորման ուղևորների բեռը մի քանի օր ուշ է վերադարձրել նրանց՝ առաջնահերթ համարելով երկու անձի՝ ԲՀԿ առաջնորդ Գագիկ Ծառուկյանի և ԱԺ ՀՀԿ խմբակցության պատգամավոր Սամվել Ալեքսանյանի ուղեբեռները:
Հիշեցնենք՝ ավելի վաղ հայտնել էինք, որ մարտի 19-ից ԲՀԿ առաջնորդ Գագիկ Ծառուկյանը, ԱԺ ՀՀԿ խմբակցության պատգամավոր Սամվել Ալեքսանյանն ու ռուսաստանաբնակ գործարար Սամվել Կարապետյանը հանգստանում էին Դուբայում: Մեր աղբյուրների փոխանցմամբ՝ Ծառուկյանը Դուբայ էր մեկնել ավագ որդու ծննդյան տարեդարձը նշելու: