Թուրքական Doğan լրատվական գործակալության փոխանցմամբ, երեկ ուշ երեկոյան Ադանայում գտնվող Սուրբ Պողոս կաթոլիկ եկեղեցին ենթարկվել է հարձակման:
Նշվում է, որ ալկոհոլի ազդեցության տակ գտնվող 26-ամյա երկու թուրքեր, իրենց միսիոներ ձևացնելով, դանակներով ներխուժել են եկեղեցի:
Եկեղեցի ներխուժելիս նրանք գոչել են` «Մենք մուսուլմաններ ենք», «Սա Թուրքիան է», «Ալլահ աքբար» (Ալլահն ամենամեծն է) և այլն: Եկեղեցում թուրք վանդալներն ավերել են քրիստոնեական սրբերի արձանիկները, սակայն եկեղեցու սպասավորներին հաջողվել է ժամանակին զանգահարել ոստիկանություն:
Ուշագրավ է, որ ոստիկանությունը գտնվել է եկեղեցուց ընդամենը 30 մետր հեռավորության վրա, ինչի շնորհիվ էլ հաջողվել է ձերբակալել հանցագործներին:
Ոստիկանատանը նրանք պատմել են իրենց վարքի պատճառի մասին. «Մենք փողոցում զբոսնում էինք, երբ մեզ մոտեցավ մի անծանոթ և ծանոթացավ մեզ հետ: Իմանալով, որ գործազուրկ ենք, մեզ առաջարկեց 500 թուրքական լիրա (ավելի քան 330 ամերիկյան դոլար)` Աստվածաշունչ բաժանելով զբաղվելու համար: Մենք հրաժարվեցինք այդ առաջարկից, ապա, վերցնելով դանակները, գնացինք եկեղեցի»: