Նախօրեին Սիլվա Համբարձումյանը «Առաջին լրատվական»-ին հարցազրույց էր տվել, որում նշել էր, որ ԱԺ ՀՀԿ խմբակցության պատգամավոր Վարդան Այվազյանն իրեն 70 հազար ԱՄՆ դոլար է պարտք: Ավելի ուշ Վարդան Այվազյանը մեզ հետ զրույցում պատասխանել էր Սիլվա Համբարձումյանին՝ նշելով, որ պարտք չէ նրան:
Մեզ հետ կրկնակի զրույցում Սիլվա Համբարձումյանը նշեց. «Ես հավատացնում եմ, որ նա [Վարդան Այվազյանը] «Ջրկապ» հանքավայրը վաճառեց ինձ 500 հազար դոլարով, հետո պարզվեց, որ հանքավայրի անունը ուրիշ տեղ է, իսկ կոորդինատների տակ հանք չկա: Ես վերադարձրի փաստաթղթերը, իրենց անունով արվեց, հինգ հարյուր հազարը պետք է վերադարձներ, մի մասը տվեց, մնաց 70 հազար դոլար: Ես շատ տեղեր եմ իրեն տեսել. Սուրբ Հովհաննեսում տեղի ունեցող հոգեհանգստին հարցրի՝ ո՞ւր է փողը, ասաց՝ գնամ Չինաստան, գնամ Վրաստան, գամ տամ, և մինչև այսօր չի տվել»,- ասաց Սիլվա Համբարձումյանը:
Հարցին՝ արդյոք այն ժամանակ Վարդան Այվազյանը նախարա՞ր էր, գործարարը պատասխանեց. «Այդ ժամանակ որ տվեցին հանքը, հետո իրեն հանեցին, և այդ հանքի տեղը սխալ էր: Եթե իրեն չհանեին, կոորդինատները կուղղեր, ինձ կմնար հանքը, բայց քանի որ նախարար չէր, չկարողացավ դա անել, վերադարձրեց իմ փողը, ես էլ՝ իրենց հիմնարկը: 70 հազարը մնաց պարտք: Ես՝ հավատալով, որ չի խաբի, ասացի՝ լավ, մաս-մաս տուր»,- ասաց Սիլվա Համբարձումյանը:
Նա նաև նշեց, որ իր հասակը 1,64 սմ է, իսկ թե ում նկատի ուներ Վարդան Այվազյանը 1,41 սմ ասելով՝ նա չգիտի:
